Işaýa 19 - Мукаддес Китап

19-нҗы бап Мүсүре гаршы пыгамберлик

¹ Мүсүр барадакы пыгамберлик: Ине, йылдам булуда атланып, Мүсүре гелйәр Реб, Мүсүр бутлары титрешерлер, мүсүрлилериң йүреклери ярылар хузурында Онуң.

² «Мүсүрлилери бири-бирине гаршы өҗүкдирерин, доган доганың гаршысына, гоңшы гоңшусының гаршысына, шәхер шәхериң гаршысына, патышалык патышалыгың гаршысына уршар.

³ Мүсүрлилериң зәхресини ярарын, ниетлерини пуҗа чыкарарын, бутларындан, өли рухларындан, җадыгөйлерден, рух чагырянлардан маслахат сорарлар.

⁴ Мүсүрлилери залым хоҗайының элине берерин, рехимсиз патыша хөкүм сүрер үстлеринден». Муны Хөкмүрован Таңры Реб айдяндыр.

⁵ Нилде сув галмаз, деря чекилер, гурар.

⁶ Онуң яплары порсар, такырар, гурар Мүсүр чешмелери, гамышлар, гаргылар чүйрәр.

⁷ Нилиң төверегиндәки, якасындакы чайырлар, онуң боюндакы бар экинлер гурап, соврулып, ёк болуп гидерлер.

⁸ Балыкчылар яс тутарлар, Ниле чеңңек ташлаянлар аглашарлар, сува тор атянларың сусты басылар.

⁹ Зыгырдан мата докаянлар лапыкеч боларлар, ак биз докаянлар умытдан дүшерлер.

¹⁰ Онуң докмачылары ховсала дүшерлер, әхли хакына тутуланлар гам чекерлер.

¹¹ Зоган шәхериниң хөкүмдарлары акмакдыр! Фараоның пайхаслы маслахатчылары пәхимсиз маслахат берйәрлер, сиз фараона нәдип: «Мен акылдарларың оглудырын, гадымы шаларың неслидирин» дийип билйәрсиңиз?

¹² Ханы, ниреде сениң акылдарларың? Гой, саңа айтсынлар олар, Хөкмүрован Реббиң Мүсүре гаршы нәме ниетләндигини аян этсинлер.

¹³ Зоганың хөкүмдарлары акмаклык этдилер! Мемфисиң баштутанлары алдандылар, тире баштутанлары Мүсүри азашдырдылар.

¹⁴ Реб акылы чашырян рухлары иберди, серхошуң өз гусугының үстүнде ыранышы дей, олар мүсүрлилери бар ишинде азашдырдылар.

¹⁵ Мүсүриң хич киме дады етмез, не баш, не гуйрук, не палма шахасы, не-де гамыш оңа ярдам эдер.

Мүсүрлилер Реббе бил баглаярлар

¹⁶ Шол гүн мүсүрлилер аял ялы болуп, Хөкмүрован Реббиң өзлерине гаршы эл галдырар горкусындан яңа титрешерлер.

¹⁷ Яхуда юрды мүсүрлилере ховп салар. Янында Яхуданың ады агзалан хер кес Хөкмүрован Реббиң Мүсүре гаршы тайынлаян карарындан горкар.

¹⁸ Шол гүн Мүсүрде бәш шәхер кенган дилинде гепләп, Хөкмүрован Ребден ант ичерлер. Оларың бири Хеләкчилик Шәхери дийип атландырылар.

¹⁹ Шол гүн Мүсүриң ортарасында Реббе гурбанлык сыпасы, серхединде болса бир сүтүн дикилер.

²⁰ Бу Мүсүр топрагында Хөкмүрован Реббе аламат ве шаят болар. Олар зулумдарлары зерарлы Реббе перят эденлеринде, Реб мүсүрлилере бир халасгәр хем горагчы ёллап, олары халас эдер.

²¹ Реб Өзүни мүсүрлилере танадар. Шол гүн мүсүрлилер Ребби танарлар. Олар гурбанлыкларыдыр галла садакалары билен Реббе ыбадат эдерлер; олар Реббе вада берип, оны берҗай эдерлер.

²² Реб Мүсүри җезаландырар, ене-де Өзи олара шыпа берер. Мүсүрлилер Реббе доланарлар, Реб-де оларың ялбармаларыны диңләп, олара шыпа берер.

²³ Шол гүн Мүсүрден Ашура улы ёл болар. Ашурлылар Мүсүре гелерлер, мүсүрлилер-де Ашура гидерлер. Мүсүрлилер ашурлар билен биле ыбадат эдерлер.

²⁴ Шол гүн Ысрайыл Мүсүр билен Ашурың янында үчүнҗи юрт болар. Оларың үсти билен дүнйә ялканар.

²⁵ Хөкмүрован Реб: «Халкым Мүсүр, Өз элимиң иши болан Ашур ве мирасым Ысрайыл ялкансын!» дийип, олара ак пата берер.