Işaýa 18 - Мукаддес Китап

18‑нҗи бап Эфиопия гаршы пыгамберлик

¹ Эфиопия деряларының аңырсында ганатларыны пасырдадян юрдуң дат гүнүне!

² Ол Нил дерясының үсти билен гамыш гәмилеринде илчилерини ёллаяр. Эй, йылдам чапарлар, юртлары дерялар билен бөлүнйән, узын бойлы, овадан беденли миллете, хер яна горкы сачан халка, хайбатлы хем басыбалыҗы миллете гидиң!

³ Эй, бүтин дүнйәниң илаты, ер йүзүнде яшаянлар! Дагларың чүр башында байдак дикиленде середиң! Сурнай чалнанда диңләң!

⁴ Реб маңа шейле дийди: «Гүнүң ховурлы ыссысы дек, хасыл вагтындакы чыглы булут дек, месгенимден үмсүм середерин».

⁵ Хасыл йыгымындан өң, гүллеме гутаранда, гүл үзүм болуп етишенде, ол баг гайчысы билен пудаклары кесер, яйраян шахалары кесип ташлар.

⁶ Хеммеси даглардакы йыртыҗы гушлара, ердәки вагшы хайванлара галдырылар. Олар томсуна йыртыҗы гушлара, гышына вагшы хайванлара шам боларлар.

⁷ Шол вагт юртлары дерялар билен бөлүнйән, узын бойлы, овадан беденли миллет, хер яна горкы сачан халк, хайбатлы хем басыбалыҗы миллет, Хөкмүрован Реббе, Хөкмүрован Реббиң адыны гоян ере, Сион дагына совгатлар гетирер.