Işaýa 16 - Мукаддес Китап

16-нҗы бап Моваплылар рехим дилейәрлер

¹ Сәхра ёлы билен Селадан Сион гызының дагына, юрдуң хөкүмдарларына гузулары ёллаң.

² Арнон гечелгесинде Мовабың аяллары хөвүртгесинден ковлан өйсүз-өвзарсыз гушлара меңзейәр.

³ «Маслахат бер, адалаты берҗай эт. Гүнортан чагы гиҗе кимин үстүмизе сая сал. Ковуланлары гизле, гачгаклары эле берме.

⁴ Мовапдан ковланлар месген тутсун араңызда; вейран эдйәнлерден олара пена болуң». Сүтемкәр ёк болуп, вейранчылык соңланар, талаңчылар йитирим боларлар.

⁵ Тагт мерхемет билен беркидилер, садыклык билен шалык сүрер Давудың несиллеринден бири, адалаты агтарян хөкүмдар догрулыгы йөредер.

⁶ Мовабың текепбирлиги, онуң хетденаша гедемлиги, мен-менлиги, улумсылыгы, газабы барада эшитдик; бош ере өвүнйәр ол.

⁷ Шонуң үчин Мовап перят этсин, хер кес Мовап үчин нала чексин, Кирхараседиң кишмишли көкелери үчин яс тутуң, гам чекиң.

⁸ Хешбоның экин мейданлары, Сибманың үзүмчиликлери гурады; башга миллетлериң баштутанлары сайлама үзүмчиликлери басгыладылар; үзүмчиликлер Язере етип, чөле ченли яйылды; шахалары яйрап, деңизден-де ашды.

⁹ Шонуң үчин Язер агысы билен Сибманың үзүмчиликлери үчин агларын мен; гөзяшым билен суварарын сизи, эй, Хешбон ве Элгала! Чүнки томус мивелериң, хасыл йыгналян дөврүндәки шагалаң шовхуныңыз кесилди.

¹⁰ Шатлык хем бегенч айрылды хасыллы баглардан; үзүмчиликлерде не айдым айдыляр, не-де хешелле какыляр; үзүм сыкянчы үзүм сыкмаяр, кесдим оларың шагалаң шовхуныны.

¹¹ Шол себәпден йүрегим Мовап үчин, Калбым Кирхарасет үчин лира дек нала чекйәр.

¹² Моваплылар сеждегәхлерине чыкып, өзлерини тапдан дүшүрйәрлер; өз мукаддес ерлерине дилег этмәге гидйәрлер, йөне бу хич пейда бермез.

¹³ Бу Реббиң Мовап хакында гечмишде айдан сөзүди.

¹⁴ Инди Реб шейле диййәр: «Хакына тутма ишчиниң мөхлети ялы үч йылың довамында Мовабың шан-шөхраты улы халкы билен бирликде абрайдан дүшер; гутуланлары җуда аз ве гүйчсүз болар».