Işaýa 15 - Мукаддес Китап

15‑нҗи бап Моваба гаршы пыгамберлик

¹ Мовап хакындакы пыгамберлик: Хакыкатдан Мовабың Ар шәхери бир гиҗеде харабалыга өврүлйәр, Мовап вейран болды! Хакыкатдан Мовабың Кир шәхери бир гиҗеде харабалыга өврүлйәр, Мовап вейран болды!

² Дибон халкы агламак үчин ыбадатхана, сеждегәхлере чыкяр; Мовап халкы Небо, Мейдеба үчин перят эдйәр. Хер кесиң башы такырланяр, хер кесиң сакгалы сырыляр.

³ Көчелеринде җул гейинйәрлер, үчеклерде, мейданчаларда хер кес перят эдйәр, зар-зар аглашяр.

⁴ Хешбон билен Элгала налыш эдйәр, сеслери Яхаса ченли эшидилйәр. Шонуң үчин Мовабың эсгерлери аглашяр, горкудан йүреклери галдыраяр.

⁵ Йүрегим Мовап үчин налыш эдйәр, гачгаклары Согара, Эглат Шелишия гачярлар. Олар аглашып, Лухутың ёкарсына чыкярлар. Вейранчылыкдан перят чекйәрлер Хоронайым ёлунда.

⁶ Нимрим сувлары гурады; отлар солды, тәзе от гөгермеди, гөк өвүсйән зат галмады асла.

⁷ Мунуң үчин газанан байлыкларыны, бар топлан затларыны сөвүт җүлгесине әкидерлер.

⁸ Агы билен долды тутуш Мовап юрды; оларың перяды Эглайыма, налышы Беерелиме етйәр.

⁹ Димоның сувлары гандан долы, эмма Мен мунданам бетерини гетирерин Димоның башына, Мовапдан гачанларың, юрдуң аман галанларының үстүне шир гетирерин.