Işaýa 11 - Мукаддес Китап

11‑нҗи бап Йышайың несли

¹ Йышайың көтүгинден бир пудак чыкар, көкүнден гөгерен Шаха миве берер.

² Реббиң Рухы: даналык хем пайхас, маслахат хем гүйч-гудрат, Ребби билмек хем Ондан горкмак рухы Онуң үстүнде болар.

³ Ол Ребден горкмакдан леззет алар, гөршүне гөрә хөкүм чыкармаз Ол, эшидишине гөрә карар чыкармаз.

⁴ Гарыплара догрулык билен казылык эдер Ол, ер йүзүндәки пукаралар үчин догры карар чыкарар. Буйрук билен җезаландырар дүнйәни Ол, пислери-де Өз сөзлери билен өлдүрер.

⁵ Догрулык хем садыклык гушак болар билине.

⁶ Мөҗек билен гузы бир ерде яшар, бир ерде ятар гаплаң ве овлак, гөле, арслан ве бир яшар мал биледир, олары бир яш бала бакар.

⁷ Сыгыр айы билен биле отлар, балалары-да биле ятар оларың, арслан өкүз дек саман иер.

⁸ Эмйән чага гара йыланың хининиң агзында ойнар, сүйтден айрылан чага элини кепҗебашың хинине сокар.

⁹ Мукаддес дагымда зелел етирилмез, хич ким хеләк эдилмез, бүтин ер йүзи деңзиң сувдан долушы дей, Ребби билмекден долар.

¹⁰ Шол гүн Йышайың көки халклара нышан болар; миллетлер Оңа йүз тутарлар, Онуң месгени шөхратлы болар.

¹¹ Шол гүн Ашурдан, Мүсүрден, Патросдан, Эфиопиядан, Эйламдан, Шингардан, Хаматдан ве адаларда аман галан халкыны ызына гетирмек үчин, Таңры икинҗи гезек элини узадар.

¹² Ол миллетлер үчин байдак галдырар, Ысрайылың сүргүндәкилерини топлар, ер йүзүниң дөрт күнҗегинден, Яхуданың дарганларыны йыгнар.

¹³ Эфрайымың габанҗаңлыгы айрылар, Яхуданың душманлары ёк эдилер, Эфрайым Яхуда гөрипчилик этмез, Яхуда Эфрайыма душманчылык этмез.

¹⁴ Олар билеликде гүнбатардакы пилиштлилериң үстүне хүҗүм эдерлер, билеликде гүндогарың халкыны таларлар, Эдома, Моваба гаршы эл галдырарлар, аммонлар табын боларлар олара.

¹⁵ Мүсүр деңзиниң айлагыны бүтинлей гурадар Реб, гүйчли ели билен элини Евфрат дерясына галгадар, еди чешмә бөлер оны, чарыклы гечерлер адамлар ондан.

¹⁶ Ысрайылларың Мүсүрден чыкан гүни Ысрайыла эдиши ялы, Реббиң Ашурда аман галан халкы үчин улы ёл ачылар.