Işaýa 10 - Мукаддес Китап

10-нҗы бап

¹ Адалатсыз парзлары чыкарянларың дат гүнүне! зорлук перманыны язянларың вай халына!

² Эҗизлериң хакыны иййәрсиңиз, ёксуллары адалатдан махрум эдйәрсиңиз, дул хатынлары авлаярсыңыз, етимлер олҗаңыз боляр.

³ Җеза гүни, узакдан бетбагтчылык геленде, нәме эдеркәңиз? Кимден көмек сораркаңыз, ниреден җай тапаркаңыз байлыгыңыза?

⁴ Есирлериң арасында дыза чөкмекден, Җесетлере бүдрәп йыкылмакдан гайры чәрәңиз болмаз сизиң. Барыбир сөнмәнди Реббиң газабы, җеза бермәге тайындыр хенизем Онуң эли.

Реббиң Ашур барадакы хөкүми

⁵ Дат гүнүңе, Ашур! Ол гахарымың хасасыдыр! Элиндәки таягыдыр газабым!

⁶ Оны худайсыз миллетиң гаршысына, газапланан халкымың гаршысына иберйәрин, оңа таламагы, таланыны олҗа алмагы, олары көчелериң палчыгы кимин аяк астына алмагы буюрдым.

⁷ Эмма Ашур патышасы бейле ниет эденок, бейле пикир этмейәр ол; йүрегинде көп миллетлери гырмак, көки-дамары билен ёк этмек күйүндедир онуң.

⁸ Ол шейле диййәр: «Лешгербашыларымың әхлиси патыша дәлми нәме?

⁹ Кално шәхери Каркемиш кимин дәлми? Арпат кимин дәлми Хамат? Самария Дамаск кимин дәлми?

¹⁰ Иерусалим билен Самарияныңкыдан-да бейик ойма бутлары болан бутпараз патышалыклары эле салшым ялы,

¹¹ Самария ве онуң бутларына эдишим ялы, Иерусалиме ве онуң бутларына-да шейле эдерин».

¹² Реб Сион дагында ве Иерусалимде әхли ишини гутаранда шейле диер: «Ашур патышасыны текепбир йүрегине, гедем бакышына гөрә җезаландырарын».

¹³ Чүнки Ашур патышасы шейле диййәр: «Муны өз элимиң гүйҗи билен, өз пайхасым билен газандым, мен пайхаслыдырын. Миллетлериң серхетлерини айырдым, оларың хазыналарыны таладым, тагтындан агдардым гүйчли шалары.

¹⁴ Миллетлериң байлыгыны тапды элим, хөвүртге тапан ялы; терк эдилен юмуртгаларың йыгналышы кимин, бүтин дүнйәни йыгнадым. Ганат какып, агзыны ачып, сес чыкаран болмады».

¹⁵ Палта өзүни ишледйәниң янында өвүнерми? Бычгы өзүни уланяндан бейгелдерми өзүни? Өзүни гөтерйәни гөтерерми таяк? Өзүни галдыряны галдырармы хаса?

¹⁶ Мунуң үчин Хөкмүрован Таңры Реб, Ашурың семизлерине хорлук ёллар, Онуң шөхратының астында от ялыны туташар.

¹⁷ Ысрайылың Нуры от, онуң Мукаддеси ялын болар, ялын онуң тикенлеридир чалыларыны бир гүнде якып-яндырар.

¹⁸ Гөзел токайларыдыр, мес топраклы ерлерини бүтинлей ёк эдер Реб, хеләк болар агыр дерде ёлуган адам дей.

¹⁹ Токайларында галан агачлар шейле аз велин, чага-да санап, язып билер олары.

Ысрайылың аман галанлары

²⁰ Шол гүн Ысрайылың аман галанлары ве Якубың несиллериниң халас боланлары мундан бейләк өзлерине җеза берйәне дәл-де, эйсем түйс йүрекден Ысрайылың Мукаддесине бил багларлар.

²¹ Аман галанлар, Якубың аман галанлары гудратлы Худая доланарлар.

²² Халкың Ысрайыл деңиз якасындакы чәге дей көп болса-да, онуң диңе аман галанлары Худая доланарлар. Карар эдилен хеләкчилик догрулык билен амала ашырылар.

²³ Гудратыгүйчли-Хөкмүрован Реб хөкүм эдиши ялы, бүтин ер йүзүнде хеләкчилиги амала ашырар.

²⁴ Шонуң үчин Гудратыгүйчли-Хөкмүрован Реб шейле диййәр: «Эй, Мениң Сионда яшаян халкым! Мүсүрлилер кимин сизе гаршы хасасыны галдырып, таяк билен уранда, сиз ашурлылардан горкмаң.

²⁵ Ине, бираз вагтдан гахарым ятышар, газабым ашурлылары хеләк этмәге гөнүгер.

²⁶ Ореп гаясында мидянлары вейран эдиши кимин, Хөкмүрован Реб олара гаршы гамчы галдырар. Хасасыны Мүсүрде ёкары галдырышы кимин деңзиң үстүне узадар.

²⁷ Шол гүн ашурлыларың йүки сизиң гершиңизден, боюнтырыгы сизиң бойнуңыздан айрылар; семизлигиңизден яңа боюнтырык дөвлер».

²⁸ Аят шәхерине гелйәрлер олар, Мигрондан гечйәрлер, Микмашда йүклерини гойярлар.

²⁹ Гечелгеден гечйәрлер олар, Гебада бир гиҗе дүшлейәрлер, Рама шәхери лерзана гелйәр, Шавулың Гибга шәхериниң илаты гачяр.

³⁰ Бар сесиңе гыгыр, эй, Галлым гызы! Гулак гой, эй, Лайша! Эй, гөргүли Анатот!

³¹ Мадмена гачып гидйәр, Гебимиң илаты пена агтаряр.

³² Бу гүн душманлар Нопда галарлар, Сион гызының дагына, Иерусалимиң депесине юмрук ченәр.

³³ Ине, Хөкмүрован Таңры Реб гудратлы гүйҗи билен кесер шахалары, иң бейик агачлар чапылар, белентликлери ере язылар.

³⁴ Токайың гүр ерлерини палта билен чапар, Ливан Гудратлы Боланың өңүнде йыкылар.