Hoşeýa 8 - Мукаддес Китап

8‑нҗи бап Ысрайыл Ребби рет эдйәр

¹ «Сурнайы додагыңа етир. Чүнки чайкел Реббиң өйүниң үстүнден айланяр. Олар Мениң әхтими бозды, кануныма гаршы чыкдылар.

² „Худайымыз, биз – Ысрайыл Сени танаярыс“ дийип, Маңа перят эдйәрлер.

³ Ысрайыл ягшылыгы рет этди. Душман оны ызарлар.

⁴ Менден сорашман, өзлерине патышалар белледилер. Менден сорагсыз сердарлары сечдилер. Күмүшден, алтындан өзлерине вейранчылык гетирйән бутлар ясадылар.

⁵ Эй, Самария, Мен сениң гөле бутуңы бүтинлей рет этдим. Мениң газабым оларың гаршысына алавлады. Хачана ченли олар пәк болуп билҗек дәл?

⁶ Чүнки бу бут Ысрайылың ишидир. Оны усса ясады. Ол Худай дәлдир. Самарияның гөлеси бөлек-бөлек болар.

⁷ Олар ел экип, тупан орарлар. Сүммүлсиз бугдай ун бермез. Хасыл берәйсе-де, өзгелер иер.

⁸ Ысрайыл ювудыландыр. Олар башга миллетлериң арасында дерексиз гап болуп галды.

⁹ Олар еке айланян гулан ялы, Ашура гитдилер. Эфрайым өзүне ойнашлары сатын алды.

¹⁰ Олары башга халклар яран болмага сатын алса, Мен олары топлап йыгнарын. Олар тизара бейик патышаның салгыдындан сандырарлар.

¹¹ Эфрайым гүнә гурбанлык бермәге, көп гурбанлык сыпаларыны гурды. Бу гурбанлык сыпалары гүнә месгени болды.

¹² Нәче көп канунлар язсам, олар муны ят зат хасап эдйәрлер.

¹³ Маңа гурбанлыклар гетирйәрлер, гурбан кесйәрлер, йөне эти өзлери иййәрлер. Реб олардан разы дәлдир. Инди оларың гүнәлери ятланар. Этмишлерине гөрә җеза берлер. Олар Мүсүре доланарлар.

¹⁴ Ысрайыл өзүни Яраданы унутды. Өзүне көшклер гурды. Яхуда хем галалары көпелтди. Йөне Мен оларың шәхерине от гөндерерин. Галаларыны от ювудар».