Hoşeýa 7 - Мукаддес Китап

7‑нҗи бап

¹ «Мен Ысрайыла эм этҗек болсам, Эфрайымың гүнәлери, Самарияның писликлери аян болар. Чүнки олар хиле гурярлар. Өйлере огры гирйәр, көчеде талаңчылык эдйәрлер.

² Оларың әхли писликлери Мениң ядымда. Олар муңа үнс бермейәрлер. Инди олары эден ишлери гуршаяр. Эден ишлери гөзүмиң өңүндедир.

³ Олар пислиги билен патышасыны, яланчылыгы билен эмелдарларыны шатландырярлар.

⁴ Оларың хеммеси зынагәрдирлер, Чөрекчиниң тамдыры ялы гызгындыр. Югрулан хамыр аҗаянча бишириҗә оды горҗамак герек дәл.

⁵ Патышаның мейлис гүнүнде эмелдарлар шерабың гызгынына хушуны йитирйәрлер. Патыша яман иш эдйәнлер билен эл-эле берйәр.

⁶ Олар хиле билен оңа якынлашяр. Оларың газабы гиҗәниң соңуна ченли яняр. Ирден болса ялынлы от ялы гахары туташяр.

⁷ Оларың барысы тамдыр ялы гызгын Өз хөкүмдарларыны хеләк эдйәрлер. Оларың патышаларының барысы йыкылды. Хич бири Мени чагырмаяр.

⁸ Эфрайым башга халклар билен гарышяр. Эфрайым бир йүзи бишмедик петир ялыдыр.

⁹ Онуң гүйҗүни өзгелер иййәр. Пархына бармады. Сачына чал сепилди. Муны билмейәр.

¹⁰ Ысрайылың текепбирлиги өзүне гаршы шаятлык эдйәр. Шонда-да олар өз Худайы Реббе доланмаярлар. Барыбир Оны гөзлемейәрлер.

¹¹ Эфрайым самсык ве акылсыз гөгерчин ялы, я мүсүрлилери чагыряр, я Ашура гидйәр.

¹² Олар гидйәркәлер Мен торумы оларың үстүне ташларын. Асманың гушлары ялы олары ашак индерерин. Олара пис ишлери үчин темми берерин.

¹³ Оларың дат гүнүне! Чүнки Менден дашлашдылар. Бела инсин башларына! Чүнки Маңа гаршы баш гөтердилер. Мен олары халас эдердим. Йөне олар Мен барада ялан сөз айтдылар.

¹⁴ Йүреклеринден маңа перят этмейәрлер. Дүшегиң үстүнде ятып увлаярлар. Галла я-да тәзе шерап үчин тенине яра салярлар. Менден болса йүз өвүрйәрлер.

¹⁵ Мен олара несихат бердим. Эллерине гүйч-кувват бердим. Йөне олар Маңа гаршы яманлык ниетледилер.

¹⁶ Олар ёк зада йүз тутярлар. Олар ыгтыбарсыз яя меңзейәрлер. Олар зәхерли дилинден, эмелдарлары гылычдан йыкылар. Мунуң үчин Мүсүрде оларың үстүнден гүлҗеклер».