Hoşeýa 6 - Мукаддес Китап

6-нҗы бап Халкың ялан тобасы

¹ «Гелиң, Реббе доланалың. Ол бизи парчалады. Өзи шыпа берер. Бизи яралады. Инди ярамызы даңар.

² Ики гүнден соңра бизи дирелдер, Хас такыгы – үчүнҗи гүни Ол бизи аяга галдырар. Онуң хузурында яшарыш.

³ Гелиң, Ребби таналың, танамага гайрат эделиң. Ол даң шапагы ялы такык гелҗек. Ол ягыш ялы бизе гелҗек, топрагы гандырян яз ягшы ялы янымыза гелҗек».

⁴ «Эй, Эфрайым, саңа нәме эдейин? Эй, Яхуда, сениң билен нәме этмели? Сизиң сөйгиңиз сәхер думаны, ердәки чыг ялы, басым ёк боляр.

⁵ Шоңа гөрә Мен олары пыгамбериң сөзи билен парчаладым. Олары агзымдан чыкан сөз билен өлдүрдим. Хөкүмим нур кимин парлаяр.

⁶ Чүнки Мен гурбанлыгы дәл, садык сөйгини ислейәрин, Якма гурбанлыгы дәл, Худайы танамаклыгы ислейәрин.

⁷ Олар Адам ата ялы, әхти боздулар, ол ерде маңа бивепалык этдилер.

⁸ Гилгат яманларың шәхери, гана боялан аяк ызларындан долудыр.

⁹ Гаракчылар адамы нәхили пейлейән болса, Руханыларың топары-да шейле. Шекем ёлунда ганхорлык эдип, эрбет җенаята улашярлар.

¹⁰ Ысрайыл өйүнде бир горкунч зат гөрдүм: Шол ерде Эфрайым зына батды. Ысрайыл харам эдилди.

¹¹ Мен халкымың өңки абаданчылыгыны гайтарып беренимде, Сениң үчин җеза гүни тайяр болар, эй, Яхуда».