Hoşeýa 5 - Мукаддес Китап

5‑нҗи бап

¹ «Муны эшидиң, эй, руханылар. Дыкгат эдиң, эй, ысрайыллар! Гулак ас, патышаның өйи! Сизиң үстүңизден хөкүм чыкарылар. Себәби сиз Миспада дузак болдуңыз. Таборда гурлан тор болдуңыз.

² Бизе газылан гарымы чуңалтдыңыз. Йөне Мен барыңызы ёла саларын.

³ Мен Эфрайымы танаярын, Ысрайылам Менден гизлин дәлдир. Чүнки сен зына этдиң, эй, Эфрайым. Ысрайыл хем харамдыр.

⁴ Буларың эден ишлери Худая доланмага гоймаяр. Чүнки оларың калбында зына рухы бар. Ребби хем танамаярлар.

⁵ Ысрайылың текепбирлиги өзүне гаршы шаятлык эдйәр. Ысрайыл хем Эфрайымың гүнәлерине бүдрәп йыкылар. Яхуда хем бирликде йыкылар.

⁶ Овнуклы-ирили мал-гаралары алып, Ребби гөзлемәге гидерлер. Йөне Оны тапмазлар. Чүнки Реб олардан чекилди.

⁷ Олар никасыз чагалар догруп, Реббе бивепалык этдилер. Тәзе Ай байрамы олары экин мейданлары билен ювудар.

Реб Ысрайыл билен Яхуда дуйдурыш эдйәр

⁸ Гибгада шах чал, Рамада сурнай. Бейтавенде сөвеш тебилини уруң. „Биз сизиң аркаңызда, Бенямин“ дийип, Бейтавенде җар чекиң.

⁹ Эфрайым җеза гүнүнде чөле өврүлер. Ысрайыл тирелериниң арасында Мен муны такык билдирерин.

¹⁰ Яхуда хөкүмдарлары арачәк дашыны сүйшүрйәнлере меңзейәр. Мен оларың үстүнден газабымы сил ялы дөкҗек.

¹¹ Зулум гөрди Эфрайым. Хөкүм билен эзилди. Чүнки билип дурубам, бош хыялың ызындан гитмек иследи.

¹² Шонуң үчин Эфрайыма гүе ялы боларын, Яхуданың неслини чүйредерин.

¹³ Эфрайым кеселини, Яхуда ярасыны гөренде, Эфрайым Ашурың янына гитди. Бейик патышадан ярдам иследи. Йөне ол сизе шыпа берип билмез, яраңыза эм этмез.

¹⁴ Мен Эфрайым үчин бир шир, Яхуданың өйи үчин боларын арслан. Олары парчалан хут Мендирин. Сүйрәп әкидерин, олары хич ким халас этмез.

¹⁵ Олар гүнәлерини боюн алып, Мениң хузурымы йүрекден агтарянчалар, хасратлы ягдайда мени ызлаянчалар, Мен өз меканыма гидерин».