Hoşeýa 4 - Мукаддес Китап

4‑нҗи бап Реб Ысрайылы айыплаяр

¹ «Эй, ысрайыл халкы, Реббиң сөзүни эшит, чүнки бу юртда яшаянлар билен Реббиң давасы бар. Себәби юртда вепалылык-да, сөйги-де, Худайы танамаклык-да ёк.

² Гаргыш ве яланчылык, ганхорлык, огурлык ве зына. Җенаятчылык артяр ве ган үстүне ган дөкүлйәр.

³ Шонуң үчин топрак хасрат чекйәр. Онда яшаянлар эҗизлейәрлер. Сәхрадакы хайванлар хем асман гушлары, хатда деңиздәки балыклар гырылярлар.

⁴ Хич кес дава этмесин. Хич кес башганы айыпламасын. Сениң халкың рухана гаршы айыплама гетирйәне меңзейәндир.

⁵ Сен гүндизликде, пыгамбер болса гиҗеликде сениң билен бүдрәр. Сениң эҗең Ысрайылы ёк эдерин.

⁶ Мениң халкым билимсизликден вейран эдилйәр. Сен билими рет эдениңден соң, Мен сени Маңа руханы болмакдан рет эдйәрин. Сен Худайың кануныны унуданыңдан соң, Мен-де сениң чагаларыңы унударын.

⁷ Руханылар нәче көпелдигиче, Мениң гаршыма шонча көп гүнә этдилер. Оларың шөхратыны масгарачылыга өврерин.

⁸ Руханылар Мениң халкымың гүнәси билен бесленип, оларың көпрәк этмиш этмегине җан чекйәрлер.

⁹ Халка нәхили болан болса, руханылара-да шейле болар. Мен оларың тутан ёллары үчин җеза берерин. Эден ишлериниң өвезини гайтарарын.

^10-12 Олар иерлер, йөне доймазлар. Олар зына эдерлер, эмма көпелмезлер. Чүнки Ребби терк эдип, бутлара чөрңешдилер. Көне хем тәзе шерап халкымың дүшүнҗесини айыряр. Олар хатда агач бутдан маслахат сораярлар! Оларың хасасы велилик эдйәр! Чүнки зыналык рухы олары ёлдан чыкарды. Зына үчин, өз Худайындан йүз өвүрдилер.

¹³ Дагың депесинде гурбанлык кесйәрлер, байырларда болса садака берйәрлер. Дуб, дерек хем дагдан агачларының ашагында садака эдйәрлер. Чүнки оларың көлегеси гойы. Шонуң үчин гызларыңыз азгынлык, гелинлериңиз болса зына эдйәрлер.

¹⁴ Сизиң азгынлык эден гызларыңыза, зына эден гелинлериңизе җеза бермерин. Чүнки эркеклериңиз лолының тарапында болярлар. Сеждегәхдәки лолы билен гурбанлык эдйәрлер. Дүшүнҗесиз халк болса хеләк боляр.

¹⁵ Эй, Ысрайыл, сен зына этсең-де, Яхуда бир гүнәли болмасын. Сиз Гилгала гирмәң, Бейтавене болса бармаң. „Ребден ант ичйәрин“ дийип касам этмәң.

¹⁶ Чүнки Ысрайыл боюн эгмезек гөле ялы хөтҗет болды. Инди Реб олары отлук ерде, гиң өрүде токлы бакан ялы бакып билерми?

¹⁷ Эфрайым бутлара япышды. Оны гой!

¹⁸ Оларың серхош отурылышыгы тамамланандан соң, зына ише гечйәрлер. Оларың сердарлары масгарачылыгы сөййәр.

¹⁹ Ел олары ганатына орап алар. Олар гурбанлыклары себәпли масгара боларлар».