Hoşeýa 12 - Мукаддес Китап

12‑нҗи бап

¹ Эфрайым ел билен нахарланяр. Узаклы гүн гүндогардан гелен ели ковалаяр. Яланчылыгы, зулумы артдыряр. Ашур билен шертнама баглашып, Мүсүре зейтун ягыны гөндерйәр.

² Яхуда билен Реббиң давасы бар. Тутан ёлуна гөрә Якуба җезасыны берҗек. Эденини гаршысына гайтарҗак.

³ Эне гарнындака, Якуп өз доганының өкҗесинден тутды. Етишен чагында Реб билен гөрешди.

⁴ Перишде билен гөрешип, еңди. Аглап онуң гөвнүни тапҗак болды. Худай оны Бейтелде тапды. Шол ерде бизиң билен геплешди.

⁵ Хөкмүрован Худай – Реб Онуң таналян адыдыр!

⁶ Инди сен Худайың көмеги билен оңа долан. Садык сөйгини ве адалатлылыгы саклап, хемише өз Худайыңа умыт баглап гөз дик.

⁷ Эфрайым тәҗирдир, элиндәки галп терезиси билен алдамагы сөййәр.

⁸ «Мен баядым – диер Эфрайым. – Өзүм үчин гор топладым. Мен нәме иш эденем болсам, хич ким менден гүнә тапмаз».

⁹ «Худайың Реб Мендирин. Сени Мүсүрден чыкардым. Байрамчылыкларда болшы ялы, сени ене чадырда яшадарын.

¹⁰ Мен пыгамберлере гепледим, Мен көп аянлык гөндердим. Пыгамберлериң үсти билен тымсаллар бердим».

¹¹ Гилгатда этмиш бар, оларың халкы нәмынасып. Гилгалда өкүзлери гурбанлык этдилер. Шол себәпли оларың гурбанлык сыпасы сүрлен мейдандакы даш үйшмеги ялы болар.

¹² Якуп Сирия юрдуна гачды. Ысрайыл ол ерде аял алмак үчин хызмат этди. Өйленмәге гоюн бакды.

¹³ Реб пыгамбер аркалы Ысрайылы Мүсүрден алып чыкды. Пыгамбер үсти билен оны горады.

¹⁴ Эфрайым Таңрыны берк газапландырды. Шонуң үчин Таңры дөкүлен ганы онуң башына гетирер. Онуң масгара ишини өзүне гайтарар.