Hoşeýa 11 - Мукаддес Китап

11‑нҗи бап Реб өз халкыны сөййәр

¹ «Ысрайылы яш вагтында сөйдүм, оны – оглумы Мүсүрден чагырдым.

² Олар чагырылдыгыча, Менден шонча узаклашдылар. Багал бутуна гурбанлык бердилер, бутлара якымлы ыслы түтетги якдылар.

³ Эфрайыма йөремеги Мен өвретдим, голумда гөтердим олары. Мениң аладамы олар билмедилер.

⁴ Олары ынсанперверлик йүплери, сөйги баглары билен Өзүме чекдим. Боюнларындан боюнтырыкларыны галдырдым. Эглип олара иймит бердим.

⁵ Олар Мүсүре доланарлар. Ашур олара патышалык эдер. Чүнки олар тобаны терк этдилер.

⁶ Галаларында гылыч ялавланып, дервезе гөзенеклерини гырар, олары ниети-пәллери себәпли ёк эдер.

⁷ Менден дәнмек пикири халкымың йүрегине көк урды. Бейик Худайы чагырсалар-да, олара хич медет бермез.

⁸ Эй, Эфрайым, Мен сенден нәдип эл чекейин? Сени нәдип терк эдейин, эй, Ысрайыл? Адма галасында боланлары саңа нәдип берейин? Себойым галасына эденими саңа-да эдейинми? Калбымда йүрегим гобсунды. Мениң мәхрим йылады.

⁹ Гызгын газабымы башыңыза индермерин. Эфрайымы яңадан вейран этмерин. Чүнки Мен ынсан дәл, Худайдырын. Сизиң араңызда Мукаддес Болан. Мен газап билен гелмерин.

¹⁰ Реб арслан ялы награ чекер. Олар Реббиң ызына эерерлер. Награ чекенде, Онуң чагалары гүнбатардан титрешип гелер.

¹¹ Мүсүрден гуш ялы, Ашурдан гөгерчин ялы титрешип гелерлер. Олары өйлерине элтип гоярын». Муны Реб айдяндыр.

Ысрайыла ве Яхуда гаршы хөкүм чыкар

¹² Эфрайым яланчылык, Ысрайыл хиле-мекирлик билен дашымы гуршады. Яхуда болса хениз Худай билен йөрейәр. Мукаддес Болана садык боляр.