Hoşeýa 10 - Мукаддес Китап

10-нҗы бап

¹ Ысрайыл бир гүр шахалы үзүм агаҗыды, бол-бол миве гетирди. Мивеси артдыгыча, шонча көп гурбанлык сыпасыны гурды. Топрагы берекетли болдугыча, дикме дашларыны безеди.

² Оларың йүреги яланчылыкдан долды. Языкларына гөрә җеза аларлар. Реб оларың гурбанлык сыпаларыны даргатҗак, дикме дашларыны сындырҗак.

³ Олар айдарлар: «Бизде патыша ёк, Ребден горкмаярыс. Патыша болса-да, бизе нәме эдип билерди?»

⁴ Бош геплейәрлер, ялан касам билен әхт эдишйәрлер. Шоңа гөрә-де «адалатлы» ишлери зәхерли от ялы, сүрлен мейданда бирден пейда боляр.

⁵ Самарияда яшаянлар Бейтавениң гөлеси үчин горкярлар. Илаты онуң үчин яс тутар. Онуң шөхраты билен җошан бутпараз руханылар аглаярлар. Чүнки шөхраты ондан гитди.

⁶ Гөле бейик патыша үчин совгат болуп, Ашура әкидилер. Эфрайым масгараланар, Ысрайыл агач бутундан уяда галар.

⁷ Самария өз патышасы билен сувуң йүзүндәки чыбык ялы акып гидер.

⁸ Ысрайылың гүнәси болан Авендәки сеждегәхлер ёк эдилер. Оларың гурбанлык сыпаларында яндак хем гызган битер. Олар даглара: «Бизи өртүң!», байырлара: «Бизиң депәмизе иниң!» диерлер.

⁹ «Эй, Ысрайыл, Гибга гүнлеринден бәри гүнә этдиңиз. Олар шол тайда гүнәлерини довам этдилер. Пислик эдйәнлере гаршы уруш Гибгада сизиң үстүңизи басмазмыка?

¹⁰ Мен ислән вагтымда олара темми берерин. Өз этмишине ики эссе даңлан вагтында, миллетлер оларың гаршысына бирлешерлер.

¹¹ Эфрайым харман дөвмеги сөййән өврендикли гөлә меңзейәрди. Мен онуң овадан бойнуна боюнтырык салмадым. Инди Эфрайыма боюнтырык саларын. Яхуда ер сүрер, Якуп болса мала басар».

¹² Өзүңиз үчин догрулык экип, садык сөйги хасылыны оруң. Тарп ериңизи ишләң. Чүнки Реббе дилег этмек вагты гелди. Ол догрулыгы үстүңизе ягдырар.

¹³ Сиз этмиш экип, адалатсызлык ордуңыз. Яланың мивесинден ийдиңиз. Чүнки сиз өз ёлуңыза хем сөвешиҗилериң көплүгине байрындыңыз.

¹⁴ Халкың арасында уруш гопгуны дөрәр. Шалманың сөвеш гүнүнде Бейтарбели вейран эдип, энелер бала-чагалары билен парчаланышы ялы, әхли галаларың хараба өврүлер.

¹⁵ Эй, Бейтел, пислигиңизиң көпдүги үчин, сизе хем шейле эдилер. Даң атанда ысрайыл патышасы бүтинлей хеләк болар.