Hagaý 1 - Мукаддес Китап

1‑нҗи бап Реб халкы ыбадатхананы тәзеден гурмага чагыряр

¹ Дарюш патышаның шалыгының икинҗи йылының алтынҗы айының биринҗи гүни Хагай пыгамбериң үсти билен Яхуданың хәкими Шеялтыелиң оглы Зерубабыла ве Ехосадагың оглы баш руханы Ешува Реббиң шу сөзи аян болды.

² Хөкмүрован Реб шейле диййәр: «Бу халк Реббиң өйүни тәзеден гурмагың вагты энтек геленок диййәр».

³ Онсоң Хагай пыгамбериң үсти билен Реббиң шу сөзи аян болды:

⁴ «Бу өй хараба болуп ятырка, өзүңизиң кашаң җайларда яшамагыңызың вагтымы?

⁵ Шонуң үчин инди Хөкмүрован Реб шейле диййәр: „Өз яшан йылларыңыза сер салып пикир эдиң.

⁶ Сиз көп экип, аз хасыл алярсыңыз, ийип доймаярсыңыз, ичип ганмаярсыңыз, гейинйәрсиңиз, йөне йылынмаярсыңыз, газанҗыңыз дүйби дешик пул торба дүшйәр“».

⁷ Хөкмүрован Реб шейле диййәр: «Өз яшан йылларыңыза сер салып пикир эдиң.

⁸ Даглыга гидиң-де, агач гетириң ве Мениң өйүми гуруң. Шонда Мен хошал боларын, шөхратланарын, муны Реб диййәр.

⁹ Сиз көп хасыла гарашярдыңыз, йөне ол хасыл аз болуп чыкды. Оны өе гетирениңизде, Мен оны еле совурдым. Нәме үчин? Мениң өйүмиң хараба өврүлип ятаны үчин! Мен муны сизиң әхлиңизиң диңе өз өйлериңиз билен гүмрадыгыңыз үчин шейле этдим. Муны Мен – Хөкмүрован Реб айдяндырын.

¹⁰ Шонуң үчин-де асман ыгалы, ер хасылы сизден гысганяр.

¹¹ Шейле хем Мен юрда ве онуң дагларына, галла мейданларына, үзүмчиликлерине, зейтун багларына, ерден өнйән әхли өнүмлере, ынсандыр хайванларың үстүне, чекйән әхли зәхметиңизиң үстүне гуракчылык җезасыны индердим».

¹² Шеялтыелиң оглы Зерубабыл билен Ехосадагың оглы баш руханы Ешува ве халкың аман галанларының әхлиси Ребден горкуп, өзлериниң Худайы Реббиң сөзүне ве Хагай пыгамбериң айданларына гулак асдылар. Чүнки Хагай пыгамбери Бейик Худай иберипди.

¹³ Онсоң Реббиң векили Хагай Реббиң шу хабарыны халка етирип, шейле дийди: «Реб: „Мен сизиң билендирин“ диййәр. Муны Реб айдяндыр».

¹⁴ Реб Яхуданың хәкими Шеялтыелиң оглы Зерубабылың, Ехосадагың оглы баш руханы Ешуваның ве халкың аман галанларының әхлисиниң калбыны оярды. Онсоң олар гелип, өзлериниң Худайы Хөкмүрован Реббиң өйүни гурмага башладылар.

¹⁵ Бу вака патыша Дарюшың шалыгының икинҗи йылының алтынҗы айының йигрими дөрдүне болуп гечди.