Habakuk 1 - Мукаддес Китап

1‑нҗи бап

¹ Хабакук пыгамбере аянлык аркалы гелен пыгамберлик.

Хабакук адалатсызлыкдан шикаят эдйәр

² Я Реб, хачана ченли медет диләп перят эдейин? Сен гулак саляңмы? Зулумдан перят эдйән, йөне Сен халас этмейәң.

³ Нәме үчин пислиги маңа гөрдүрйәң? Яманлыга ненең чыдаяң? Зорлук ве зулум гөзүмиң алнында, уруш-галмагалың, җенҗелиң соңы геленок.

⁴ Шонуң үчин кануның гүйҗи ёк, адалата ёл ёк. Эрбетлер догручыллардан үстүн чыкярлар, шейдибем, хакыкат ёюляр.

Реббиң җогабы

⁵ «Миллетлере середиң! Хайран галың! Сизиң гүнлериңизде этҗек ишими эшидениңизде, гулагыңыза ынанмарсыңыз.

⁶ Өзгелериң юртларыны эелеҗек болуп, дүнйәниң чар тарапына йөриш эдйән рехимсиз ве залым бабыл миллетини сизе гаршы өҗүкдирерин.

⁷ Айылганч хем горкунчдырлар, өз дүзгүнлерине гөрә херекет эдйәрлер.

⁸ Атлары барсдан йүврүк, өзлерем гиҗеки ач гуртдан гудуз. Атлылары узакдан ер газап гелйәр, ав үстүне топулян бүргүт дек окдурылярлар.

⁹ Зулум этмекде оларың хыялы, чөлүң ели кимин өңе дызаяр. Есирлери чәге кимин топлаярлар.

¹⁰ Патышалары масгаралаярлар, хөкүмдарлары яңсылаярлар, галаларың үстүнден гүлйәрлер, янында депе ясап, эле салярлар.

¹¹ Олар ел кимин гечип гидйәрлер. Бу гүнәли адамларың худайы – өз гүйчлери».

Хабакук ене-де Реббе шикаят эдйәр

¹² Овалдан бар болан Сен дәлми, я Реб?! Мукаддес Худайым биз өлмерис! Эй, Реб, бабыллылары бизе хөкүм этсин дийип сайладың, эй, Гаям, олары бизе җеза берсин дийип белледиң.

¹³ Пислиги гөрерден пәкдир гөзлериң, яманлыга середип билйән дәлсиң Сен. Хилегәрлере ненең җеза бермән чыдаяң, эрбетлер өзлеринден догрыны ювудярка, Сен нәмә дымяң?

¹⁴ Сен ынсанлары деңиздәки балыклар ялы, сердарлары болмадык сүйрениҗилер ялы этдиң.

¹⁵ Душманлар олары чеңңек билен тутярлар, торлары билен авлаярлар, гиң торда гыра чекип чыкарярлар. Муңа шатланып, хешелле какярлар.

¹⁶ Олар худайлары хөкмүнде торуна гурбанлык берйәрлер, торуң хатырасына якымлы ыслы түтетги якярлар, чүнки торы олары леззетли дурмуш, бол сачак билен үпҗүн эдйәр.

¹⁷ Торларыны бошатмагыны довам эдерлерми? Миллетлери рехимсизлик билен гырарлармы?