Gelip çykyş 9 - Мукаддес Китап

9-нҗы бап Худай Нух билен әхт эдйәр

¹ Худай Нуха хем-де онуң огулларына шейле пата берди: «Өрңәң, көпелиң, ер йүзүни долдурың.

² Әхли хайванлар, гушлар, сүйрениҗилер ве балыклар сизден җуда горкуда яшарлар; оларың хеммеси сизиң ыгтыярыңыза берилйәр.

³ Җанлы-җандарларың әхлиси сизе иймит болар; эдил гөк өсүмликлери бершим ялы, оларың хеммесини Мен сизе берйәрин.

⁴ Йөне оларың этини ганы билен иймәң. Җан гандадыр.

⁵ Сизиң ганыңызы дөкене өлүм җезасыны берерин. Адам өлдүрен ислендик хайвана я-да ынсана Мен җеза берерин.

⁶ Кимде-ким бир ынсаның ганыны дөксе, онуң ганы хем ынсан тарапындан дөкүлсин. Чүнки Худай ынсаны Өз кешбинде ярадандыр.

⁷ Сиз өрңәп, көпелиң ве ер йүзүне яйраң».

⁸ Худай Нуха ве онуң огулларына йүзленип, шейле дийди:

^9-10 «Мен инди сиз ве сизден соңкы гелҗек неслиңиз билен, шейле хем сизиң билен гәмиден чыкан әхли җандарлар: гушлар, маллар ве ер йүзүндәки хайванларың бары билен әхт баглашярын.

¹¹ Мен сизиң билен әхт баглашярын. Инди хич хачан бүтин җанлы-җандарлар сил билен хеләкленмез ве тутуш ер йүзүни вейран этҗек сил гелмез.

¹² Мениң сиз хем-де сизиң билен болан әхли җандарлар билен несилден-несле эдйән эбедилик әхтимиң нышаны шудур:

¹³ булутларың арасында ерлешдирен әлемгошарым Мениң дүнйә билен эден әхтимиң нышаны болар.

^14-15 Ериң йүзүни булут өртүп, булутларың арасында әлемгошар гөрненде, Мен сизиң ве әхли җанлы-җандарлар билен эден әхтими ятларын. Мундан бейләк Мен хич хачан бүтин җанлы-җандарлары сил билен хеләклемерин.

¹⁶ Булутларда әлемгошар пейда болан махалы оны гөрүп, Мен ер йүзүниң әхли җанлы-җандарлары билен эден бакы әхтими ятларын».

¹⁷ Худай Нуха: «Ер йүзүндәки әхли җанлы-җандарлар билен Мениң баглашан әхтимиң нышаны, ине, шудур» дийди.

Нух ве онуң огуллары

¹⁸ Сам, Хам, Яфес Нухуң гәмиден чыкан огулларыды. (Хам Кенганың атасыды.)

¹⁹ Нухуң үч оглы шуларды. Тутуш ер йүзүниң ынсанлары шулардан яйрады.

²⁰ Нухуң өзи дайханды. Ол илки билен үзүм агачларыны отуртды.

²¹ Ол шерап ичип, ондан серхош болуп, өз чадырының ортарасында ялаңач ятырды.

²² Кенганың какасы Хам өз какасының ялаңачдыгыны гөрүп, муны бейлеки ики доганына хабар берди.

²³ Сам билен Яфес гейим алып, оны омузларына атдылар ве еңселейин йөрәп барып, какаларыны гейиндирдилер. Олар йүзлерини башга тарапа өврүп, какаларының ялаңачлыгыны гөрмедилер.

²⁴ Нух серхошлыгындан ачылансоң, көрпе оглуның өзүне нәме эдендигине гөз етирип шейле дийди:

²⁵ «Кенгана нәлет сиңсин, ол доганларының элинде, гулларың гулы болсун.

²⁶ Самың Худайы Реббе алкыш болсун! Кенган Сама гул болсун.

²⁷ Худай Яфеси өрңетсин, Яфесиң несиллери Самларың чадырларында яшасын, Кенган Яфесе гул болсун».

²⁸ Нух силден соң ене үч йүз элли йыл яшады.

²⁹ Ол җеми докуз йүз элли яшап дүнйәден өтди.