Gelip çykyş 2 - Мукаддес Китап

2‑нҗи бап

¹ Шейдип, тутуш әлем-җаханың ве ондакы әхли затларың ярадылышы тамамланды.

² Худай единҗи гүнде әхли ишини тамамлап, шол гүн дынч алды.

³ Худай единҗи гүни айратын гүн хөкмүнде ялкады, себәби Ол шол гүн әхли ярадыш ишлерини тамамлап, дынч алды.

Адам ата билен Хов эне Эрем багында

⁴ Худайымыз Реб гөги ве ери яраданда болуп гечен вакалар шулардыр: Худайымыз Реб ери ве гөги яраданда,

^5-6 ер йүзүнде хениз гырымсы агач ёкды, гөк от хем битмәнди, чүнки Худайымыз Реб ере ягыш ягдырманды ве ери беҗермек үчин энтек хич кими яратманды, эмма ериң астындан чыкан сув тутуш топрагы суварарды.

⁷ Худайымыз Реб топракдан адам ярадып, онуң бурнуна дирилик непесини үфледи. Шейдип, адам җанлы барлык болды.

⁸ Худайымыз Реб гүндогарда ерлешен Эремде баг отурдып, адамы шол ерде ерлешдирди.

⁹ Худайымыз Реб ол ерде сүйҗи, дүрли-дүрли овадан мивели агачлары гөгертди. Багың ортарасында ики саны дарагт: яшайыш дарагты хем-де ягшыны-яманы сайгарыш дарагты барды.

¹⁰ Эрем багыны суварян деря Эремиң ичинден акып гечип, багың гутаран еринде дөрт деря бөлүнйәр.

^11-12 Биринҗи деряның ады Пишондыр; ол деря алтына бай болан бүтин Хавыла юрдуның ичинден акып гечйәр. Ол ерде сап алтын, бдолах хем-де хакык диен гымматбаха дашлар бар.

¹³ Икинҗи деряның ады Гихондыр. Ол тутуш Куш юрдуның ичинден акып гечйәр.

¹⁴ Үчүнҗи деряның ады Тигрдир. Ол Ашурың гүндогарындан акып гечйәр. Дөрдүнҗи болса Евфрат дерясыдыр.

¹⁵ Эрем багыны ишләп беҗерери ве оңа гөзегчилик эдери ялы, Худайымыз Реб адамы ол багда ерлешдирди.

¹⁶ Худайымыз Реб адама шейле эмр этди: «Сен багдакы ислән агачларың мивесинден аркайын ийип билерсиң.

¹⁷ Йөне ягшыны-яманы сайгарыш дарагтының мивесинден иймегин, чүнки шондан иен гүнүң сен хөкман өлерсиң».

¹⁸ Худайымыз Реб: «Адама екелик ягшы дәл, оңа өзүне лайык көмекчи ярадайын» дийди.

¹⁹ Худайымыз Реб әхли хайванлары, гушлары топракдан дөретди ве адамың олары атландырышыны гөрмек үчин, олары онуң янына гетирди. Адам әхли җанлы-җандарлара нәме ат берен болса, шол-да оларың ады болды.

²⁰ Шунлукда, адам әхли маллара, гушлара, әхли хайванлара ат берди. Йөне адамың өзүне лайык көмекчи тапылмады.

²¹ Худайымыз Реб адамы агыр ука гидерди; адам укудака, Реб онуң бир гапыргасыны алып, бошап галан ерини эт билен өртди.

²² Худайымыз Реб адамың беденинден алан шол гапыргасындан аял яратды ве оны адамың янына гетирди.

²³ Адам оны гөрүп: «Ине, сүеги өз сүегимден, тени өз тенимдендир; ол аял болар, чүнки ол эркекден алнандыр» дийди.

²⁴ Шол себәпден хем эркек ата-энесини ташлап, аялы билен биригйәр ве оларың икиси бир тен боляр.

²⁵ Адам-да, онуң аялы-да ялаңачдылар, олар хениз утанманы билмейәрдилер.