Галатялылар 5 - Мукаддес Китап

5‑нҗи бап Мукаддес Канун аркалы акланҗак болмаң!

¹ Иса Месих бизи азат этмек үчин бошатды. Шонуң үчин-де берк дуруң, гулчулык боюнтырыгыны гайтадан салдырмаң.

² Гулак гоюң! Ине, мен, Павлус, сизе шуны диййәрин: эгер сиз өзүңизи сүннетлетмәге ёл берсеңиз, онда Месихиң эденлери сизиң үчин көр көпүкдир.

³ Өзүни сүннетлетмәге ёл берен хер бир адама мен ене-де бир гезек шуны мәлим эдйәрин: ол тутуш Мукаддес Кануны берҗай этмәге борчлудыр.

⁴ Эй, өзүни Мукаддес Канун аркалы акламакчы болянлар! Сиз Месихден айрылдыңыз, Худайың мерхеметинден махрум болдуңыз.

⁵ Биз болса Мукаддес Руха даянып, умыт баглаян акланмамыза иман билен гарашяндырыс.

⁶ Чүнки Иса Месихе дегишли боланларың арасында не сүннетлилигиң, не-де сүннетсизлигиң әхмиети бардыр. Диңе сөйгә даянян иман әхмиетлидир.

⁷ Сиз шейле оңат гадам урярдыңыз ахырын. Сизи хакыката ынандырмаҗак болуп, ким сизиң гадамыңыза бадак салды?

⁸ Сизи бу ынандырма чагырян Худайдан дәлдир!

⁹ Уҗыпсыз хамырмая тутуш хамыры туршадяндыр.

¹⁰ Сизиң башгача пикир этмеҗекдигиңиз бабатда Реб мени ынандыряр. Сизиң пикириңизи булашдырян ким болса болуберсин, ол өз җезасыны чекер.

¹¹ Эй, доганларым! Эгер мен хениз-де сүннетленилмәни вагыз эдйән болсам, онда мен нәме үчин ызарланяркам?! Эгер догрудан-да шейле болян болса, онда Исаның хачы бабатдакы вагзым бүдреме дашы болмазды.

¹² Сизи булашдырян адамлар, гой, өз-өзлерини дүйбүнден агта эдәйсин!

Мукаддес Руха лайыклыкда яшаң!

¹³ Эй, доганларым! Сиз азат болмага чагырылансыңыз. Йөне бу азатлыгыңызы ынсан хөвеслериңизи канагатландырмак үчин уланмаң. Гайтам, бирек-биреге сөйги билен хызмат эдиң.

¹⁴ Чүнки тутуш Мукаддес Канун: «Якыныңы өзүңи сөйшүң ялы сөй» диен бир буйрукда җемленендир.

¹⁵ Әгә болуң! Чүнки сиз бири-бириңизи «чейнемеги», «ювутмагы» бес этмесеңиз, бири-бириңизи ёк эдерсиңиз.

¹⁶ Сизе шуны айдасым гелйәр: Мукаддес Рухуң йөрелгесинден йөрәң. Шонда сиз ынсан хөвеслерине эермерсиңиз.

¹⁷ Чүнки ынсан хөвеслери Мукаддес Руха гаршыдыр; Мукаддес Рух хем ынсан хөвеслерине гаршыдыр. Олар бири-бири билен хич оңушмаярлар. Шонуң үчин-де, сиз өз ислән задыңызы эдип билмейәрсиңиз.

¹⁸ Эмма сиз Мукаддес Руха эерйән болсаңыз, Кануна гөрә яшамага борчлы дәлсиңиз.

¹⁹ Ынсан хөвеслериниң нетиҗеси беллидир. Олар зынахорлык, харамлык ве азгынлыкдыр;

²⁰ бутпаразлык ве дога-җадыгөйликдир; йигренч, агзалалык, гөриплик, гахар, бәсдешлик, җедел, бөлүнишик

²¹ ве бахыллык; серхошлык, азгынлык мейлислери ве шуңа меңзеш затлардыр. Мен сизе өң дуйдурышым ялы, ене-де бир гезек дуйдурярын: кимде-ким шулар ялы яшаян болса, Худайың Шалыгыны мирас алмаз.

²² Мукаддес Рухуң мивелери болса шулардыр: сөйги, шатлык, парахатлык, сабырлылык, мәхрибанлык, ягшылык, садыклык,

²³ юмшаклык, өзүңе эрк эдип билмеклик. Бу затлара гаршы чыкян канун ёкдур.

²⁴ Иса Месихе дегишли боланлар өз ынсан хөвеслерини ве җошгунларыны хача чүйләндирлер.

²⁵ Мукаддес Рух бизе тәзе яшайыш берйәр. Шоңа гөрә-де, гелиң Оңа эерелиң.

²⁶ Шөхратпараз болмалың, бири-биримизи гахарландырмалың, бири-биримизе гөриплик этмәлиң.