Галатялылар 4 - Мукаддес Китап

4‑нҗи бап

¹ Мен сизе шуны хем айдайын: мирасдүшер тутуш мүлкүң хоҗайыны болса-да, чагалык дөврүнде гулдан хич тапавуды ёкдур.

² Ол атасының беллән вагтына ченли доландырыҗының ве ынамдар адамларың гөзегчилигинде боляндыр.

³ Биз хем чага ялы боланымызда, бу дүнйәниң эсасы йөрелгелериниң гулудык.

⁴ Эмма белленилен вагт етип геленде, Худай Өз Оглуны иберди. Ол аялдан доглуп, Мукаддес Кануна лайыклыкда яшады.

⁵ Буларың бары Мукаддес Кануның гулы болуп яшаянларың азат болмагы үчин, бизиң-де огуллыгың әхли хукукларыны алып билмегимиз үчин эдилди.

⁶ Сиз огуллыга кабул эдилениңиз үчин, Худай Өзүни «Абба!, Атам!» дийип чагырян Оглуның Рухуны бизиң йүреклеримизе иберди.

⁷ Шунлукда, сиз инди гул дәл-де, Худайың огулларысыңыз. Огул боланыңыз үчин, Худай сизи Өзүниң мирасдүшери эдйәндир.

Павлус галатялылары гайгы-алада эдйәр

⁸ Сиз өң Худайы танамаярдыңыз. Шол дөвүрде сиз галп худайларың гулудыңыз.

⁹ Инди болса сиз Худайы танаярсыңыз, догрусы, Худай тарапындан таналянсыңыз. Шундан соң сиз нәдип шол эҗиз ве ярамаз йөрелгелере доланярсыңыз?! Я-да гайтадан оларың гулы болмак ислейәрсиңизми?

¹⁰ Сиз дини байрамлара: мукаддес гүнлере, Тәзе Ай байрамларына, пасыл байрамларына ве йыллара үнс берйәрсиңиз ахырын!

¹¹ Мен сиз бабатда улы алада галярын. Эйсем мениң зәхметим бидерек болаярмыка?

¹² Эй, доганларым, ялбарярын: мен ялы болуң! Себәби мен хем сиз ялы боландырын. Сиз маңа хич нәхаклык этмедиңиз.

¹³ Мен сизе илкибашда Хош Хабары сыркавкам вагыз эдендигим ядыңыздадыр.

¹⁴ Шонда яравсызлыгым сизи кын ягдая салса-да, сиз маңа әсгермезчилик этмәндиңиз, мени рет этмәндиңиз. Терсине, мени Худайың перишдеси ялы, Иса Месихиң хут Өзи ялы кабул эдипдиңиз.

¹⁵ Инди ол шатлыгыңыза нәме болды? Мениң өзүм дири шаят ахырын: сиз элиңизден гелсе, өз гөзүңизи хем оюп, маңа берҗекдиңиз-ә!

¹⁶ Эйсем, мен сизе хакыкаты айдянлыгым үчин, инди душманыңыза өврүләйдимми?

¹⁷ Кәбир догансумаклар бетпәллерине эерип, сизи бизден айрып, өз тарапларына чекмәге җан эдйәрлер. Олар диңе өзлери бабатда ыхласлы болмагыңызы ислейәрлер.

¹⁸ Ягшылык үчин диңе мен яныңыздакам дәл, эйсем хемише ыхласлы болмак ягшыдыр.

¹⁹ Эй, эзиз балаларым! Сиз тә Иса Месихиң хәсиетлерине долы эе болянчаңыз, мен ене-де сизиң үчин догурма бургуларыны чекйән ялы болярын.

²⁰ Вах, эдил шу вагт сизиң яныңызда болуп, әхеңими үйтгетседим! Себәби мен сизи шейле алада эдйәрин!

Хаҗар ве Сара

²¹ Эй, Мукаддес Кануна гөрә яшамакчы болянлар! Мен шуны сорамакчы: эйсем сиз Төвратда языланы билмейәңизми?

²² Төвратда Ыбрайымың ики оглуның боландыгы барада язылгыдыр. Оларың бири гырнак аялындан, бейлекиси болса азат аялынданды.

²³ Гырнакдан оглуның болмагы адаты бир затды. Эмма азат аялындан болан оглы берлен вада гөрә доглупды.

²⁴ Бу ерде меңзетме бардыр. Ики аял ики әхтиң нышаныдыр. Бир әхт Синай дагында эдилип, Хаҗара меңзейәр. Себәби ол гул чагалары дүнйә индирйәр.

²⁵ Хаҗар Арабыстандакы Синай дагыны аңладып, хәзирки Иерусалиме хем меңзейәр. Себәби ол чагалары билен гулчулыкдадыр.

²⁶ Эмма гөклердәки Иерусалим азатдыр. Ол бизиң энемиздир.

²⁷ Мукаддес Язгыларда: «Шатлан, эй, чага догмадык өнелгесиз, бургуда болмадык, бегенчден айдым айт! Чүнки өң терк эдилен аялың огуллары әрли аялың огулларындан көп болар» – дийип язылгыдыр.

²⁸ Эй, доганларым, инди сиз Ысхак ялы вада гөрә доглан огулларсыңыз.

²⁹ Тен боюнча доглан огул Худайың Рухуның гүйҗи аркалы доглан оглы ызарлап, оңа азар берипди. Хәзир хем шейледир.

³⁰ Эмма Мукаддес Язгылар нәме диййәр? «Гырнагы оглы билен биле чыкарып ков. Гырнагың оглы азат аялдан доглан огул билен мирасы пайлашмаз».

³¹ Шунлукда, эй, доганларым, биз гырнагың чагалары дәл-де, азат аялың чагаларыдырыс.