Галатялылар 3 - Мукаддес Китап

3‑нҗи бап Канунчылыга доланмаң!

¹ Эй, акмак галатялылар! Сизиң гөзүңизи ким баглады? Мен сизе Хош Хабары вагыз эденимде, хача чүйленен Иса Месихи хут өз гөзүңиз билен гөрйән ялыдыңыз ахырын!

² Мен сизден диңе бир зады сорамакчы: сиз Мукаддес Рухы Кануны берҗай эдип алдыңызмы? Элбетде, ёк! Сиз Мукаддес Рухы эшиден Хош Хабарыңыза иман эдениңиз үчин алдыңыз.

³ Сиз Мукаддес Рух билен башлап, инди-де өз ынсан гүйҗүңиз билен кәмил болҗак боляңызмы? Эйсем сиз шейле акмакмы?!

⁴ Эйсем башдан гечиренлериңизиң бары бидерек болайдымыка? Вах, элбетде бидерек дәл!

⁵ Худай сизе Өз Рухуны берип, араңызда көп гудратлары гөркезди. Ол булары Мукаддес Кануны берҗай эдениңиз үчин дәл-де, Хош Хабары эшидип, оңа ынанандыгыңыз үчин этди.

Худай иман эденлери ялкаяр

⁶ Гелиң, Ыбрайымы яда салалың: «Ыбрайым Худая иман этди ве Худай оны догры хасаплады».

⁷ Шоңа гөрә-де, шуны билип гоюң: иман эденлер Ыбрайымың хакыкы неслидир.

⁸ Худай Ыбрайыма: «Әхли миллетлер сен аркалы ялканар» дийип, оңа илкибашда бушлапды. Мукаддес Язгыларың шу сөзлери Худайың миллетлери иманларына гөрә аклаҗакдыгыны овалдан хабар берипди.

⁹ Шунлукда, иман эдйән хер кес иман гулы болан Ыбрайым билен биле ялканяндыр.

¹⁰ Эмма Мукаддес Кануны долы берҗай этмелидир өйдүп, оңа даянянлар нәлет астындадыр. Чүнки: «Бу Канун китабыны долы ерине етирмедик адама, гой, нәлет болсун!» дийип язылгыдыр.

¹¹ Худайың хузурында хич ким Мукаддес Канун аркалы акланып билйән дәлдир. Бу месе-мәлим зат, себәби «догручыл иман аркалы яшар» дийип язылгыдыр.

¹² Мукаддес Кануны берҗай этмек болса имана баглы дәлдир. Эмма «оны берҗай эдйән адам аман галар».

¹³ Месих Кануның ыглан эден нәлетини Өз үстүне алып, бизи шол нәлетден халас этди. Чүнки Төвратда: «агачдан асылан хер кес нәлетленендир» дийип язылгыдыр.

¹⁴ Хава, Иса Месих буларың барыны Ыбрайыма берлен ялканышың Өзи аркалы башга миллетлере хем яйрамагы үчин, иман аркалы вада берлен Мукаддес Рухы алып билмегимиз үчин этди.

Реббиң Ыбрайыма берен вадасы

¹⁵ Эй, доганлар! Мен гүнделик дурмушдан бир мысал гетирейин: ынсанларың өзара ылалашып баглашан әхтини хич ким бозуп-да, оңа зат гошуп-да билмейәр.

¹⁶ Худай Ыбрайым билен әхт баглашды. Ол бу әхти берҗай этҗекдиги барада Ыбрайыма ве онуң неслине вада берди. Мукаддес Язгыларда «сениң несиллериңе» дийип көпчүлик барада дәл-де, «сениң хут өз неслиңе» дийип, еке-тәк Бири барада вада берлендир. Бу хем Иса Месихдир.

¹⁷ Шейлеликде, мен сизе шуны айтмакчы: дөрт йүз отуз йыл геченден соң берлен Мукаддес Канун бу әхти бозуп-да, Худайың вадасыны ятырып-да билйән дәлдир.

¹⁸ Мирас канун боюнча дәл-де, вада боюнча берилйәндир. Худай бу мирасы Ыбрайыма пешгеш берди. Чүнки Худай оңа вада берипди.

Мукаддес Кануның максады

¹⁹ Онда Мукаддес Канун нәмә герек болды? Ол гүнәниң нәмедигини гөркезмек үчин гошмача берлипди. Канун Худайың вадасы ве Ыбрайымың несли болан Месих гелйәнчә херекет этди. Бу Канун перишделер аркалы төвеллачы Мусаның гатнашмагында берлипди.

²⁰ Еке-тәк бириниң болан еринде болса төвеллачы герек болмаяр. Худай хем еке-тәк боланы үчин, вадасыны төвеллачы аркалы дәл-де, гөнүден-гөни берипди.

²¹ Диймек, Мукаддес Канун Худайың вадасына гаршы чыкяр-да?! Элбетде, ёк! Йөне Канун бизе яшайыш берип билмейәр ахырын. Муңа гөрә, ол аркалы догрулыгы-да газанып билмейәрис.

²² Эмма Мукаддес Язгыларың ыглан этмегине гөрә, бизиң әхлимиз гүнәниң туссагларыдырыс. Худай болса бизе вада берен пешгешини Иса Месихе иман эдйәнимиз үчин берйәр.

²³ Биз Иса Месихе иман этмезден өң Мукаддес Кануның гулудык, гелеҗекки иман аян болянча, бу Кануның туссагыдык.

²⁴ Шунлукда, биз иман аркалы акланып билер ялы, Мукаддес Канун Месих гелйәнчә, бизиң тербиечимиз болды.

²⁵ Биз инди Иса Месихе иман эдйәрис. Шонуң үчин-де, биз мундан бейләк Кануның гөзегчилигинде дәлдирис.

Сиз Худайың мирасдүшерисиңиз

²⁶ Сизиң барыңыз Иса Месихе дегишли болуп, Оңа болан иманыңыз аркалы Худайың перзентлерисиңиз.

²⁷ Чүнки сува чүмдүрилиш аркалы Иса Месих билен бириген сизиң барыңыз инди Оңа беслененсиңиз.

²⁸ Инди яхуды дәл билен яхудының, гул билен эркин адамың, эркек билен аялың арасында хич бир парх ёкдур. Иса Месихе дегишли боланыңыз үчин, инди барыңыз бирсиңиз.

²⁹ Эгер сиз Месихе дегишли болсаңыз, онда Ыбрайымың неслисиңиз ве берлен вада гөрә мирасдүшерсиңиз.