Filipililer 4 - Мукаддес Китап

4‑нҗи бап Өвүтлер

¹ Шунлукда, эй, сөйгүли доганларым, Реббиң хатырасына берк дуруң! Мен гара гөзүңизе зардырын. Эзизлерим, сиз мениң шатлыгым ве башымың тәҗисиңиз.

² Мен Эводия-да, Синтихә-де ялбарярын: Реббиң хатырасына ылалашыклы болуң.

³ Эй, мениң садык ёлдашым, саңа-да ялбарярын: бу аяллара көмек эт. Олар мен, Клемент ве яшайыш китабына атлары язылан бейлеки ишдешлерим билен бирликде Хош Хабары яйратмакда тутанъерли ишледилер.

⁴ Ребде шатланың. Ене-де гайталаярын: шатланың!

⁵ Гой, юмшаклыгыңыз хеммелере белли болсун. Реб якындыр.

⁶ Хич зады гайгы этмәң. Гайтам, Худая шүкүр эдип, хер бир ягдайдакы әхли мәтәчликлериңизи Оңа дога-дилеглерде айдың.

⁷ Шонда Худайың парахатлыгы йүреклериңизи ве пикирлериңизи Иса Месих аркалы горар. Бу парахатлык ынсан дүшүнерден җуда белентдир.

⁸ Умуман, эй, доганлар, хакыкы, хормата мынасып, догры, пәк, якымлы, аҗайып нәме бар болса, шол барада ойланың. Хава, ягшы ве өвгә мынасып затлар барада ойланың.

⁹ Менден өвренен, кабул эден, эшиден ве гөрен затларыңызы амал эдиң. Шонда парахатлык берйән Худай сизиң билен болар.

Пешгешлер үчин миннетдарлык

¹⁰ Ахырсоңы мен барада ене-де алада эдип башланыңыза Ребде өрән шатландым. Сиз озал хем алада эдйәрдиңиз, йөне муны гөркезмәге мүмкинчилигиңиз ёкды.

¹¹ Мен муны нәмедир бир зада мәтәч боланым үчин айтмаярын. Себәби хер ягдайда барыма кайыл болмагы өвренендирин.

¹² Мен мәтәчлигиң-де, болелинлигиң-де нәмедигини билйәрин. Мен доклукда я ачлыкда, болелинликде я мәтәчликде яшасам-да, гараз, хер ягдайда ве хер халда канагатлы болмагың тәрини өврендим.

¹³ Маңа кувват берйән Иса Месих аркалы әхли зады башарярын.

¹⁴ Хер нәхили болса-да, мениң мушакгатларыма шәрик болуп, говы этдиңиз.

¹⁵ Эй, филипилилер! Мен Македониядан чыкып гайдып, Хош Хабары илки-илкилер вагыз эдип башлан дөврүмде сизиң йыгнагыңыздан башга йыгнак маңа мадды көмегини берен дәлдир. Муны сизиң өзүңиз-де билйәнсиңиз.

¹⁶ Сиз хатда Салоники шәхеринде мәтәчлик чекен дөврүмде-де маңа гайта-гайта көмегиңизи етирипдиңиз.

¹⁷ Мен муны пешгешлериңизе хантама боланым үчин айтмаярын. Мен сизиң бәхбидиңизиң артмагыны ислейәрин.

¹⁸ Мениң хемме задым бар, артыгы билен бар. Эпафродит сизиң иберен пешгешлериңизи гетирели бәри, кем задым галмады. Булар хошбой ыслы гурбанлык кимин Худайың халаян гурбаныдыр.

¹⁹ Шөхратлы Худайым Өз байлыгы билен сизиң, ягны Иса Месихе дегишли боланларың әхли мәтәчликлериниң өвезини долар.

²⁰ Атамыз Худая эбеди ве бакы шөхрат болсун! Омын.

Саламлар

²¹ Иса Месих аркалы Худайың халкына дегишли боланларың барына салам айдың. Мениң янымдакы доганлар сизе салам айдярлар.

²² Худайың халкының әхлиси, ылайта-да императора хызмат эдйәнлер сизе салам айдярлар.

²³ Реббимиз Иса Месихиң мерхемети, гой, сизе яр болсун! Омын.