Filipililer 3 - Мукаддес Китап

3‑нҗи бап Сүннетленмә дәл-де, имана даянян догрулык

¹ Шунлукда, эй, доганларым, гой, шатлыгыңызың гөзбашы Реб болсун! Сизе шинди язянымы гайта-гайта язмак маңа кын дәл. Бу сизи горамак үчиндир:

² шол «итлерден», шол беткәрлерден, шол пүрчүк «чапыҗылардан» сересап болуң.

³ Биз Мукаддес Рух аркалы Худая ыбадат эдип, Иса Месих билен магтанярыс, ынсан гүйҗүне даянмаярыс. Шоңа гөрә-де, хакыкы сүннетлилер биздирис!

⁴ Эгер ынсан гүйҗүне даянмалы болса, онда бу бабатда мениң долы тутарыгым бардыр. Эгер ене кимдир бири тене даянмага тутарыгы бардыр өйтсе, мениңки ондан-да көпдүр.

⁵ Мен дүнйә иненимден секизленҗи гүнде сүннет эдилендирин. Мен ысрайыл халкының бенямин тиресинден болуп, еврейлериң еврейидирин. Яхудыларың Кануныны берҗай этмек бабатда хем фарисейдирин.

⁶ Дин угрундакы ыхлас дийсеңиз, иманлылар йыгнагына азар бердим. Мукаддес Кануна даянян догрулык дийсеңиз, айыпсыздым.

⁷ Эмма өң бәхбитли саян затларымы инди Месихиң хатырасына бидерек сайярын.

^8-9 Хава, мен Реббим Иса Месихи танамагың аҗайып белентлигиниң хатырасына әхли зады бидерек сайярын. Мен Онуң хатырасына әхли затдан гечип, буларың барыны чөп-чөр сайярын. Мен Месихи газанасым ве Онуң билен мәкәм биригесим гелйәр. Мен Мукаддес Кануна даянян өз догрулыгыма дәл, эйсем Месихе болан имана даянян, иман аркалы Худайдан болан догрулыга эе боласым гелйәр.

^10-11 Мен Иса Месихиң Өзүни, Онуң дирелишиниң гүйҗүни билесим гелйәр. Иса Месихиң җебир-җепаларына шәрик болуп, Оңа Онуң өлүминде меңзәп, өлүмден дирелише етесим гелйәр.

Максада ымтылмак

¹² Шунлукда, мен буларың барына етендирин я-да кәмиллешендирин өйдемок. Эмма мен булары газанмак үчин җан эдйәрин. Себәби Иса Месих мени шу максат билен газанды.

¹³ Эй, доганлар! Мен булары газанандырын өйдемок. Эмма еке-тәк шуны велин эдйәндирин: ызда галан затлары унудып, өңдәкилере етмәге ымтылярын.

¹⁴ Мен Худайың Иса Месих аркалы гөклердәки яшайша чагырян байрагыны алмак үчин, максадыма тарап ылгаярын.

¹⁵ Шоңа гөрә-де, иманда кәмил боланларымызың бары, гой, шу нукдайназардан пикир этсин. Эгер хайсыдыр бир зат бабатда башга пикирде болсаңыз, онда Худай сизе муны хем айдыңлашдырар.

¹⁶ Биз сайлан ёлумыз билен өңе тарап гитмели.

¹⁷ Эй, доганлар! Мениң гөрелдәме эерйәнлере гошулың. Бизиң гөрелдәмизе гөрә яшаянлара үнс берип, олардан өврениң.

¹⁸ Мен озал муны сизе гайта-гайта айдыпдым. Инди болса аглап, ене айдярын: Месихиң хачына душман болуп яшаянлар көпдүр.

¹⁹ Оларың соңы вейранчылыкдыр, оларың гара гарынлары худайларыдыр, олар өз масгаралыгына буйсаняндырлар. Олар диңе бу дүнйәниң затлары барада ойланяндырлар.

²⁰ Биз болса гөклериң раятлары болуп, Халасгәр Реббимиз Иса Месихиң шол ерден гелерине сабырсызлык билен гарашяндырыс.

²¹ Себәби Иса Месих бизиң эҗиз ве әхмиетсиз беденлеримизи өзгердип, Өз шөхратлы беденине меңзедер. Ол муны хер зады Өзүне табын этмеги башарян гүйҗи аркалы амала ашырар.