Filipililer 2 - Мукаддес Китап

2‑нҗи бап

¹ Шунлукда, эгер Месих билен болмаклык сизи рухландырян болса, Онуң сөйгүсинден теселли тапян болсаңыз, Мукаддес Рух билен якын гатнашык саклаян болсаңыз, рехим-шепагатыңыз ве дуйгудашлыгыңыз бар болса,

² мениң бегенҗимиң үстүни етириң: пикирдеш болуң, бири-бириңизи сөйүң, рухуңыз ве максадыңыз бир болсун.

³ Өз шахсы ислегиңизден я-да шөхратпаразлыкдан херекет этмәң. Терсине, башгалары өзүңизден үстүн сайып, песпәл болуң.

⁴ Хер кес диңе өз бәхбидини дәл, эйсем башгаларың бәхбидини хем арасын.

⁵ Иса Месихиң гарайышлары сизде хем болсун:

⁶ Иса Месих Худайың тебигатына эе болса-да, оны Өзүне дереҗе саймады, ондан мәкәм япышмады.

⁷ Гайтам, бир гул кимин болуп, ынсан кешбинде бу дүнйә инди, Ол Өзүни асла хич этди. Ол ынсан сыпатына гирип,

⁸ өлүме, хатда хачдакы өлүме-де табын болды, Өзүни песелтди.

⁹ Шоңа гөрә Худай Оны җуда бейгелтди: Оңа әхли атдан үстүн бир ады берди.

¹⁰ Гөклердәки, ердәки, ер астындакы хер кес Исаның ады агзаланда дыз эпер,

¹¹ Ата Худайың шан-шөхраты үчин, хер дил Иса Месихиң Ребдигини ыкрар эдер.

Йылдызлар дей парламак

¹² Эй, эзизлерим, мен яныңыздакам, сиз Худайың сөзүне гулак асярдыңыз. Эмма мениң ёклугымда гулак асмагыңыз хас-да мөхүмдир. Худайың хузурында горка ве галпылда гапланып, халас болмак үчин ягшы ишлери амал эдиң.

¹³ Чүнки Худай Өз гөвнүнден турян ишлери этмек үчин сизе гуҗур-гайрат берип, сиздәки ишини амал эдйәр.

¹⁴ Хер бир зады хүңүрдемән, зейренмән берҗай эдиң.

¹⁵ Шонда сиз эгри ве азгын неслиң арасында эдил әлемдәки йылдызлар дек парлаян, Худайың айыпсыз, пәк ве мүйнсүз чагалары боларсыңыз.

¹⁶ Яшайыш берйән Хош Хабары гайым тутуң. Шонда мен бидерек ере ыхлас этмәндигим, азабымың пуҗа чыкмандыгы бабатда Месихиң гелҗек гүнүнде магтанып билерин.

¹⁷ Сизиң Реббе эдйән иманыңыз ве хызматыңыз Оңа багыш эдилен гурбанлык киминдир. Эгер-де мениң шинди чекйән җебирлерим бу гурбанлыга гошулса, мен шатдырын. Мен хеммәңизиң шатлыгыңыза шәрикдирин.

¹⁸ Шоңа гөрә, сиз хем шатланып, мениң шатлыгыма шәрик болуң.

Тимотеос ве Эпафродит

¹⁹ Реббимиз Иса ёл берсе, ягдайларыңызы билип ынҗалмак үчин, тиз вагтда яныңыза Тимотеосы иберерин дийип умыт эдйәрин.

²⁰ Тимотеос хем эдил мен ялы сиз бабатда шейле ыхласлы, шейле җаныпкеш. Ондан башга ибермәге шейле адамым-да ёк.

²¹ Себәби көп адамлар Иса Месихиң дәл-де, өз бәхбидини араяр ахырын.

²² Эмма Тимотеосың садыклыгы сизе мәлимдир. Ол маңа Хош Хабары вагыз этмекде эдил оглуң өз атасына хызмат эдиши ялы хызмат этди.

²³ Шонуң үчин-де, мен ягдайымың нәхили болҗагыны билен бадыма, оны сизиң яныңыза иберерин дийип умыт эдйәрин.

²⁴ Мениң тиз вагтда яныңыза барҗакдыгым бабатда Реб мени ынандыряр.

²⁵ Сиз мәтәчлигимде мен барада алада этмек үчин илчиңиз Эпафродити яныма иберипдиңиз. Эмма мен оны, ягны өз ишдешими, сөвешдешими ве доганымы ызына, сизиң яныңыза ибермеги макул билдим.

²⁶ Ол сизиң әхлиңизи өрән гөреси гелди. Онуң хассалыгы барада эшидендигиңизи биленде болса, гаты гайгыланды.

²⁷ Догрудан-да, ол өлүм халында болуп, тас өлүпди. Эмма Худай оңа, диңе оңа дәл, эйсем хасрат үстүне хасрат чекмезим ялы, маңа хем рехим этди.

²⁸ Шоңа гөрә-де, сиз Эпафродити гөрүп, гайтадан бегенерсиңиз, мениң-де гайгы-хасратым еңләр дийип, оны яныңыза өрән ибересим гелди.

²⁹ Оны Ребдәки доганыңыз хөкмүнде улы шатлык билен гаршылаң. Онуң ялы адамлары хорматлаң.

³⁰ Чүнки ол сизиң маңа эдип билмедик хызматыңызың өвезини долмак үчин, җаныны ховп астына салып, Месихиң ишиниң угрунда тас өлүпди.