Filipililer 1 - Мукаддес Китап

1‑нҗи бап

¹ Иса Месихиң гуллары болан мен Павлусдан ве Тимотеосдан Иса Месих аркалы Худайың халкына дегишли болан филипилилериң барына, шол санда йыгнак ёлбашчыларына ве хызматчыларына догайы салам!

² Атамыз Худайың ве Реббимиз Иса Месихиң мерхемети, парахатлыгы, гой, сизе яр болсун!

Шүкүрлер ве дога-дилеглер

³ Мен хер гезек сиз барада ойлананымда, Худайыма шүкүр эдйәрин.

⁴ Сизиң әхлиңиз үчин шатланып, элмыдама Худая дога-дилеглер эдйәрин.

⁵ Чүнки сиз илкинҗи гүнден тә шу вагта ченли Хош Хабары яйратмакда хызматдашлык эдйәрсиңиз.

⁶ Сизде ягшы иши башлан Худайың муны Иса Месихиң гелҗек гүнүне ченли битирҗекдигине ынанярын.

⁷ Мен туссаглыкда болсам-да, Хош Хабары горап, оны ыкрар этсем-де, сиз маңа берлен мерхеметли гуллукда элмыдама хызматдашлык эдйәрсиңиз. Шонуң үчин-де мен сиз бабатда шейле шатланмага хаклыдырын. Чүнки йүрегимиң төрүнде орнуңыз бар ахырын!

⁸ Мен сизи гөрмәге интизардыгыма ве Иса Месихиң сөйгүси билен сөййәндигиме Худайың хут Өзи шаятдыр.

⁹ Мен сөйгиңизиң билимде ве йити дүшбүликде болелин долуп-дашмагыны Худайдан дилейәрин.

¹⁰ Чүнки мен сизиң мөхүм затлары сайгарып, Иса Месихиң гелҗек гүнүнде пәк ве мүйнсүз болмагыңызы ислейәрин.

¹¹ Шонда дурмушыңыз Иса Месих аркалы амала ашян догры ишлерден долуп-дашар, сиз Худая өвги ве шан-шөхрат гетирерсиңиз.

Хош Хабары туссаг эдип болмаяр

¹² Инди болса, эй, доганлар, сизе шулары мәлим эдесим гелйәр: мениң башыма инен күлпетлер догрудан-да Хош Хабарың яйрамагына ярдам этди.

¹³ Шунлукда, мениң Месих себәпли туссаг эдилендигим көшк горагчыларына ве бейлекилериң барына мәлим болды.

¹⁴ Мениң бу туссаглыгым имандакы доганларымың көпүсини рухландырды. Олар горкман, батыргайлык билен Хош Хабары вагыз эдйәрлер.

¹⁵ Хава, оларың кәбирлери мениң билен бәслешип, Иса Месих барадакы Хош Хабары бахыллыкдан вагыз эдйәрлер, кәбирлери болса ягшы ниетден вагыз эдйәрлер.

¹⁶ Булар мениң Хош Хабары горамак үчин сайланандыгымы билип, оны сөйги билен вагыз эдйәрлер.

¹⁷ Эмма бейлекилер Месихи пәк йүрекден дәл-де, өз бәхбитлерини арамак үчин вагыз эдип, туссаглыкдакы күлпетлерими артдырмакчы болярлар.

¹⁸ Эденлеринде нәме?! Хер нәхили болса-да, исле бетпәлликден, исле-де ягшы ниетден, барыбир олар Иса Месихи вагыз эдйәрлер. Мен муңа бегенйәрин. Хава, гайта-гайта бегенерин,

¹⁹ себәби дога-дилеглериңиз ве Иса Месихиң Рухуның көмеги аркалы бу күлпетлериң маңа азатлык гетирҗекдигини билйәрин.

²⁰ Чүнки мен асла утанҗа галмаҗакдыгыма, хемишеким ялы шинди хем мертлик билен херекет этҗекдигиме ынанярын. Мен яшасам-да, өлдүрилсем-де, мениң беденим аркалы Месих бейгелдилер.

²¹ Чүнки мениң үчин яшайыш Месихдир, өлүм-де бәхбитлидир.

²² Эмма яшасам, хасыллы зәхмет чекерин. Шонуң үчин-де хайсысыны сайлаҗагымы билмейәрин.

²³ Мен ики дагың арасында галдым: мен дүнйәден өтүп, Месихиң янында болмак ислейәрин. Бу җуда ягшыдыр;

²⁴ эмма мениң дири галмагым сизе хас-да гереклидир.

²⁵ Мен шу бабатда ынамым боланы үчин, дири галҗакдыгымы билйәрин. Хава, иманда ве онуң берйән шатлыгында өсүп билериңиз ялы, мен ене-де сизиң араңызда галарын.

²⁶ Шоңа гөрә-де, мен туссаглыкдан бошап, яныңыза баранымда, сиз Иса Месихиң мениң үчин эденлери бабатда хас-да көп магтанып билерсиңиз.

Дурмуш йөрелгәңиз Хош Хабара лайык болсун

²⁷ Эй, доганлар, дурмуш йөрелгәңиз Иса Месихиң Хош Хабарына лайык болсун. Шонда яныңыза барып сизи гөрсем-де, яныңызда болман, сиз барада эшитсем-де, Хош Хабара даянян иман угрунда бир адам ялы гөрешип, еке-тәк бир Рухда берк дурандыгыңызы билерин.

²⁸ Шейле-де, өзүңизе гаршы чыкянлардан асла горкмаяндыгыңызы билерин. Сизиң иманда шейле берк дурмагыңыз оларың хеләк болҗакдыгындан, сизиң болса халас эдилҗекдигиңизден нышандыр. Булар Худай тарапындыр.

²⁹ Чүнки сизе диңе Иса Месихе иман этмек дәл, эйсем Онуң хатырасына җебир-җепа чекмек хем берлендир.

³⁰ Сиз мениң гөрешими өзүңиз гөрдүңиз, ол барада шинди хем эшидйәнсиңиз. Бу гөрешиме сиз хем шәриксиңиз.