Ezra 8 - Мукаддес Китап

8‑нҗи бап Сүргүнден гайдып гелен уругбашылар

¹ Артаксеркс патышаның дөврүнде мениң билен биле Бабылдан чыкан уругбашылар ве оларың несил язгысы шудур:

^2-3 Пинехасың неслинден Гершом; Ытамарың неслинден Даныел; Давудың неслинден Хатуш, Шеканяның несиллери. Парошың неслинден Закаря ве онуң билен несил дарагты боюнча хасаба алнан йүз элли эркек адам.

⁴ Пахатмовабың неслинден Зерахяның оглы Элёгейнай ве онуң билен ики йүз эркек адам.

⁵ Яхазыялың неслинден Шеканя ве онуң билен үч йүз эркек адам.

⁶ Адиниң неслинден Ёнатаның оглы Эбет ве онуң билен элли эркек адам.

⁷ Эйламың неслинден Аталяның оглы Ешагя ве онуң билен етмиш эркек адам.

⁸ Шепатяның неслинден Микайылың оглы Зебадя ве онуң билен сегсен эркек адам.

⁹ Ёвабың неслинден Ехиелиң оглы Абадя ве онуң билен ики йүз он секиз эркек адам.

¹⁰ Ёсыпяның неслинден Шеломыт ве онуң билен йүз алтмыш эркек адам.

¹¹ Бебайың неслинден Бебайың оглы Закаря ве онуң билен йигрими секиз эркек адам.

¹² Азгадың неслинден Хакатаның оглы Ёханан ве онуң билен бир йүз он эркек адам.

¹³ Адоныкамың соңкы несиллеринден боланларың атлары: Элипелет, Егиел, Шемагя ве олар билен алтмыш эркек адам.

¹⁴ Бигвайың неслинден Утай, Закур ве олар билен етмиш эркек адам.

Ыбадатхана хызматына тайярлык

¹⁵ Мен оларың хеммесини Ахава тарап акян деряның боюна йыгнадым. Биз ол ерде үч гүн дүшледик. Мен халкы ве руханылары бир лай гөзден гечиренимде, левилерден екеҗесине-де гөзүм дүшмеди.

¹⁶ Онсоң мен баштутанлар Элигезери, Ариели, Шемагяны, Элнатаны, Ярыбы, Элнатаны, Натаны, Закаряны, Мешулламы ве пәхим-пайхаслы адамлар болан Ёярыбы, Элнатаны чагыртдым.

¹⁷ Олары Касыпядакы баштутан Ыдоның янына ибердим. Бизе Худайымызың ыбадатханасында гуллук эдер ялы адам ибермеклери үчин, Касыпядакы Ыдо ве онуң гарындашларына – ыбадатхана хызматкәрлерине нәме диймелидигини олара айтдым.

¹⁸ Худайымызың ялкамагы билен олар бизиң янымыза Ысрайылың човлугы, Левиниң агтыгы Махлының неслинден болан Шеребя атлы дана адамы ве онуң огулларыдыр гарындашларыны – җеми он секиз адамы гетирдилер.

¹⁹ Шейле хем Хашабяны, онуң билен Мерарының неслинден болан Ешагяны ве онуң гарындашларыдыр оларың огулларыны – җеми йигрими адамы;

²⁰ булардан башга-да Давут билен онуң эмелдарларының левилере хызмат этмәге беллән ыбадатхана хызматкәрлериниң несиллеринден ики йүз йигримисини гетирдилер. Оларың әхлисиниң ады тутулды.

²¹ Худайымызың өңүнде өзүмизи песелдип, ёлда бизи, балаларымызы ве әхли эмләгимизи горамагыны Ондан диләп, Ахава дерясының боюнда агыз беклемеги ыглан этдим.

²² Чүнки мен патышадан ёлда бизи душмандан горар ялы эсгерлер ве атлылары дилемәге чекиндим. Биз патыша: «Худайымыз Өзүни агтарянларың хеммесине мерхемет эдйәр. Өзүнден йүз өвренлериң гаршысына болса Онуң газабы гүйчлүдир» дийип айдыпдык.

²³ Шейдип, биз агыз бекләп, Худайымыздан бизи горамагыны дилег эдип ялбардык. Ол хем бизиң дилегимизи эшитди.

²⁴ Соңра мен он ики руханы ёлбашчысыны: Шеребяны, Хашабяны оларың он саны гарындашы билен бирликде сайлап алдым.

²⁵ Патышаның, онуң геңешчилериниң, баштутанларының ве бүтин ысрайыл халкының Худайымызың өйи үчин садака берен алтыныны, күмшүни ве гап-гачларыны олара чекип бердим.

^26-27 Оларың элине бир мүң бир йүз батман күмүш, бир йүз етмиш батмана лайык күмүш окаралар, бир йүз етмиш батман алтын, йигрими гадага лайык йигрими саны алтын окара, алтын ялы гыммат, ловурдап дуран бүрүнчден эдилен ики саны гап-гаҗы өлчәп бердим.

²⁸ Мен олара шейле дийдим: «Сиз Реббе багыш эдиленсиңиз, бу гап-гачлар хем багыш эдилендир. Бу алтындыр күмүш сизиң ата-бабаларыңызың Худайы Реббе берлен мейлетин садакадыр.

²⁹ Бу затлары Реббиң өйүниң отагларында баш руханыларың ве левилериң Иерусалимдәки Ысрайыл уругбашыларына говшурянчаңыз, олары берк горап саклаң».

³⁰ Шейдип, руханылардыр левилер алтындыр күмши ве Худайымызың Иерусалимдәки өйүне әкидилмек үчин өлчелип берлен гап-гачлары кабул эдип алдылар.

³¹ Онсоң биринҗи айың он икинҗи гүни биз Ахава дерясының боюндан Иерусалиме бакан ёла рована болдук. Ёлда Худайымыз бизиң билен биле болуп, Ол бизи ёлдакы гаракчылардан ве душман элинден халас этди.

³² Биз Иерусалиме гелип, ол ерде үч гүн галдык.

³³ Дөрдүленҗи гүн Худайымызың өйүнде алтындыр күмүш ве гап-гачлар өлчелип, олар Урыяның оглы руханы Меремотың элине берилди. Меремотың янында Пинехасың оглы Элгазар барды. Леви тиресинден болан Ешуваның оглы Ёзабат ве Биннуйың оглы Ногадя хем оларың янындады.

³⁴ Әхли зат саналып, өлчелип, әхлисиниң җеми аграмы язылып алынды.

³⁵ Онсоң есирликден, сүргүнден гайдып геленлер Ысрайыл Худайына якма гурбанлыклар бердилер. Бүтин Ысрайыл үчин он ики өкүз, тогсан алты гоч, етмиш еди гузы, гүнә гурбанлыгы үчин хем он ики эркеч бердилер. Буларың хеммеси Реббе якма гурбанлык үчинди.

³⁶ Патышаның перманларыны болса онуң хөкүмдарларына, Евфрат дерясының гүнбатарындакы велаятың хәкимлерине етирдилер. Олар халка ве Худайың өйүне көмек этдилер.