Ezra 6 - Мукаддес Китап

6-нҗы бап Дарюш Курешиң перманыны тассыклаяр

¹ Онсоң Дарюш патышаның буйрук бермеги билен Бабылдакы хазыналарың сакланян ша архивлеринде барлаг гечирилди.

² Мадай велаятында ерлешйән Экбатана галасындан болса бир кагыз тапылды. Онда шейле язгы барды: «Перман:

³ Куреш патыша өз шалыгының илкинҗи йылында Худайың Иерусалимдәки өйүниң тәзеден гурлушыгы барада шейле буйрук берди: „Бу өйде садакалар ве якма гурбанлыклар берилсин; өйүң бейиклиги-де, ини-де алтмыш тирсек болсун.

⁴ Диварларының үч хатары ёнулан дашлардан ве бир хатары агачдан өрүлсин. Харч-хараҗадың хеммеси ша хазынасындан төленсин.

⁵ Шейле хем Небукаднесар тарапындан Худайың Иерусалимдәки өйүнден алнып, Бабыла гетирилен алтындыр күмүш гаплар ызына элтилип, ене-де ыбадатханада ерли-еринде гоюлсын. Сиз олары Худайың өйүнде гоймалысыңыз“».

⁶ Шейдип, Дарюш патыша шейле хабар ёллады: «Евфрат дерясының аңырсындакы велаятың хөкүмдары Татенай, Шетар Бозенай хем-де яранларыңыз болан Евфрат дерясының аңырсындакы велаятың векиллери, сиз өе голайлашмаң.

⁷ Худайың өйүниң ишине пәсгел бермәң. Гой, яхудыларың хәкими ве баштутанлары Худайың бу өйүни өңки еринде тәзеден гурсунлар.

⁸ Мунуң үстесине-де, мен сизе яхудыларың баштутанларына Худайың бу өйүниң гурулмагы үчин, нәме көмек этмелидигиңиз барада перман чыкарярын. Бу адамларың харҗы долулыгына ве гиҗикдирилмән ша хазынасындан Евфрат дерясының гүнбатарындакы велаятың берйән салгыдындан төленсин.

⁹ Гөгүң Худайына якма гурбанлыклар бермек үчин өкүзчелер, гочлар, гузулар ве башга-да нәме зерур болса, бугдай, дуз, шерап, яг герек болса, Иерусалимдәки руханыларың иследигиче хер гүн хөкман берилсин.

¹⁰ Шейдип, олар Гөгүң Худайыны хошал эдәйҗек гурбанлыклары берип, патышаның ве онуң огулларының җанларының саглыгы үчин дилег этсинлер.

¹¹ Шейле хем ким шу пермана боюн эгмесе, онуң өйүнден пүрс согрулып, өй эесини шоңа чишлемеги буйрук берйәрин. Онуң өйи болса харабалыга өврүлсин.

¹² Гой, Иерусалими өзүне ыбадат эдилмели ер хөкмүнде сайлан Худай, бу перманы үйтгетмәге ве Худайың бу өйүни йыкмага сынанышан хер бир патышаныдыр халкы ер билен егсан этсин. Мен – Дарюш патыша буйрук берйәрин: бу перман җаныпкешлик билен берҗай эдилсин!»

Ыбадатхана Худая багыш эдилйәр

¹³ Онсоң Дарюш патышаның иберен хатына лайыклыкда, Евфрат дерясының гүнбатарындакы велаятың хәкими Татенай, Шетар Бозенай ве оларың яранлары Дарюш патышаның перманыны долы берҗай этдилер.

¹⁴ Шейдип, Хагай пыгамбер билен Ыдоның оглы Закаряның пыгамберлик этмеклери аркалы, яхудыларың баштутанлары ыбадатхананы гурдулар; оларың ишлери илерледи. Олар Ысрайыл Худайының эмри билен, Парс патышалары Курешиң, Дарюшың ве Артаксерксиң перманы билен бу бинаны гуруп гутардылар.

¹⁵ Бу өй Адар айының үчүне, Дарюшың патышалыгының алтынҗы йылында гурлуп гутарылды.

¹⁶ Онсоң ысрайыл халкы, руханылардыр левилер ве сүргүнден гайдып гелен башгалар хем Худайың бу өйүниң багышланма дабарасыны улы шатлык билен белледилер.

¹⁷ Олар Худайың өйүниң багышланма дабарасында бир йүз өкүзи, ики йүз гочы, дөрт йүз гузыны ве Ысрайыл тирелериниң санына гөрә, бүтин ысрайыл халкы үчин гүнә гурбанлыгы хөкмүнде он ики эркеҗи гурбанлык бердилер.

¹⁸ Мусаның Китабында язылышы ялы, Иерусалимде Худая хызмат этмеклери үчин олар руханылары ве левилери дүрли топарлара бөлдүлер.

Песах байрамы

¹⁹ Биринҗи айың он дөрдүнҗи гүни сүргүнден гайдып геленлер Песах байрамыны белледилер.

²⁰ Руханылардыр левилер инлерини тәмизледилер; оларың хеммеси тәмизди. Шонуң үчин левилер әхли сүргүнден гайдып геленлер үчин, өз руханы доганлары ве өзлери үчин Песах җанлысыны сойдулар.

²¹ Ысрайылың сүргүнден гайдып гелен халкы, шейле хем Ысрайыл Худайы Реббе ыбадат этмек үчин шол ерли халкларың неҗис ишлеринден эл чекип, яхудалара гошуланларың бары оны ийдилер.

²² Онсоң олар еди гүнләп улы шатлык билен Петир байрамыны белледилер. Чүнки Реб олара шатлык берди ве Ысрайыл Худайының өйүни гурмага яхудалара ярдам берери ялы, Ашур патышасының калбында олара болан рехим оярды.