Ezra 4 - Мукаддес Китап

4‑нҗи бап Душманлар ыбадатхананың дикелдилмегине гаршы болярлар

^1-2 Сүргүнден гайдып геленлериң Реббиң ыбадатханасыны гуряндыкларыны эшиден Яхуданың ве Беняминиң душманлары Зерубабылың ве уругбашыларың янына гелип, олара: «Бизем сиз билен биле гураялы, чүнки биз хем сизиң Худайыңыза сежде эдйәрис. Бизи бу ере гетирен Ашур патышасы Эсархадоның дөврүнден бәри, биз Оңа гурбанлык берип гелйәрис» дийдилер.

³ Эмма Зерубабылдыр Ешува ве бейлеки Ысрайыл уругбашылары олара: «Худайымыза өйи биз сиз билен биле гурмарыс. Парс патышасы Курешиң бизе буйрушы ялы, Ысрайыл Худайы Реббе өйи бизиң өзүмиз гурарыс» дийип җогап бердилер.

⁴ Онсоң бу юрдуң илаты яхуда халкы Реббиң өйүни гуруп йөркә, олары горкузып, эллерини ишден соватдылар.

⁵ Яхудаларың ниетлерини амала ашыртмазлык үчин, оларың гаршысына маслахатчылар тутдулар. Бу ягдай Парс патышалары Курешиң патышалык эден дөврүнден тә Дарюшың дөврүне ченли довам этди.

Иерусалимиң дикелдилмеги тогтадыляр

⁶ Ксерксиң дөврүнде ол патышалык эдип башлан бадына, Яхуданың ве Иерусалимиң илатыны айыплап, оңа хат яздылар.

⁷ Артаксерксиң патышалыгы дөврүнде-де Бишлам, Митредат, Табеел ве оларың яранлары Парс патышасы Артаксерксе хат яздылар. Хат арамей дилинде язылып, терҗиме эдилди.

⁸ Рехум хәким ве Шимшай мүрзе дагы Иерусалими яманлап, патыша Артаксерксе хат яздылар.

^9-10 Шейле-де Рехум серкерде, Шимшай мүрзе, оларың яранлары: хәкимлер, векиллер, эмелдарлар, парслар, эреклилер, бабыллылар, Сузадакы эйламлылар, бейик хем шөхратлы Оснапарың гөчүрип, Самарияның галаларында ве Евфрат дерясының гүнбатарындакы велаятда ерлешдирен миллетлери патыша хат яздылар.

¹¹ Ине, оларың иберен хатының нусгасы: «Патыша Артаксерксе: Сизиң Евфрат дерясының гүнбатарындакы велаятда яшаян гулларыңыз сизе салам ёллаярлар.

¹² Ине, сизиң яныңыздан гайдан яхудыларың бизиң янымыза Иерусалиме гелендигини сизе мәлим эдйәрис. Олар бу питнечи ве пис шәхери тәзеден гуруп йөрлер. Олар бинятлары беҗерип, диварлары битирип гелйәрлер.

¹³ Эгер бу шәхер тәзеден гурлуп, диварлар дикелдилсе, оларың салгыт, пач, төлег төлемеги бес этҗекдиклерини, мунуң болса патышалыгың газнасына зыян етирҗекдигини биз патыша аян эдйәрис.

¹⁴ Көшгүң дуз-чөрегини иййәнлигимиз үчин, оларың бизиң гөзүмизиң алнында патышаны әсгермезлик этмеклерине ёл бермегиң бизе гелишмеҗекдиги себәпли, биз сизе хат үсти билен хабар ёллаярыс.

¹⁵ Ата-бабаларыңызың тарых язгыларыны барладың. Тарых язгыларында сиз бу шәхериң питнечи, патышалара ве велаят хәкимлерине зыянлы шәхердигине гөз етирерсиңиз. Ирки дөвүрлерде-де бу шәхерде гозгалаңлар турупдыр. Шол себәплем ол хараба өврүлди.

¹⁶ Биз муны патыша аян эдйәрис. Эгер бу шәхер тәзеден гурлуп, диварлар дикелдилсе, онда Евфрат дерясының гүнбатарындакы велаятда сизиң раятлыгыңыз болмаз».

¹⁷ Патыша Рехум хәкиме, Шимшай мүрзә оларың Самарияда ве Евфрат дерясының гүнбатарындакы велаятда яшаян яранларына шейле җогап иберди:

¹⁸ «Сизиң бизе ёллан хатыңызың терҗимеси мениң хузурымда окалды.

¹⁹ Мениң буйрук бермегим билен барлаг гечирилди хем-де бу шәхериң гечмишде патышаларың гаршысына баш галдырандыгы ве онда питне, гозгалаң турандыгы аныкланылды.

²⁰ Иерусалимде гүйчли патышалар болуп, олар Евфрат дерясының гүнбатарындакы бүтин велаята хөкүм йөредйән экенлер. Олара салгыт, пач, төлег төленилйән экен.

²¹ Шонуң үчин ол адамлара иши бес этмеги буйруң. Менден буйрук болянча, бу шәхер тәзеден гурулмасын.

²² Йөне бу ишде сересап болуң, харсаллык этмәң, патышалыга зыян гетирҗек ягдай дөремесин».

²³ Артаксеркс патышаның хатының нусгасы Рехум хәкимиң, Шимшай мүрзәниң ве оларың яранларының өңүнде окалан бадына, олар ховлукмачлык билен Иерусалиме яхудыларың янына барып, зорлук ве гүйч билен олары иши тогтатмага меҗбур этдилер.

²⁴ Шейдип, Худайың Иерусалимдәки өйүниң дикелдиш ишлери тогтадылды. Бу ягдай Парс патышасы Дарюшың патышалыгының икинҗи йылына ченли довам этди.