Ezra 3 - Мукаддес Китап

3‑нҗи бап Гурбанлык сыпасы ясаляр

¹ Ысрайыллар өз галаларында ерлешенлеринден соң, единҗи айда әхли илат Иерусалиме йыгнанды.

² Худайың адамы Мусаның канунында язылышы ялы, Ёсадагың оглы Ешува бейлеки руханылар билен, Шеялтыелиң оглы Зерубабыл өз гарындашлары билен Ысрайылың Худайына якма гурбанлыкларыны бермек үчин, гурбанлык сыпасыны ясадылар.

³ Олар ерли халклардан горкансоңлар, гурбанлык сыпасыны өңки еринде ясадылар. Олар гурбанлык сыпасында эртирине ве агшамына Реббе якма гурбанлыкларыны бердилер.

⁴ Олар Төвратда язылышы ялы, Чатма байрамыны белледилер. Дүзгүне лайыклыкда, хер гүн үчин берилмели гүнделик якма гурбанлыкларыны санына гөрә бердилер.

⁵ Соңра хемишелик якма гурбанлыкларыны, Тәзе Айда ве Реббиң мукаддес байрамларында берилйән садакалары ве хер кимиң Реббе мейлетин садакаларыны бердилер.

⁶ Единҗи айың биринҗи гүнүнден башлап, олар Реббе якма гурбанлыкларыны берип башладылар. Эмма Реббиң ыбадатханасының энтек дүйби тутулманды.

Ыбадатхананың дүйби тутуляр

⁷ Шонуң үчинем олар даш ёнуҗылара, нечҗарлара пул, сидонлылара ве сурлулара Ливандан деңиз үсти билен Яфо ченли кедр агачларыны гетирмеклери үчин иймит, ичги ве зейтун ягыны бердилер. Олара бу затлары этмәге Парс патышасы Курешден ругсат барды.

⁸ Иерусалимдәки Худайың өйүне гайдып геленлеринден соң, икинҗи йылың икинҗи айында Шеялтыелиң оглы Зерубабыл ве Ёсадагың оглы Ешува өз галан адамлары, руханылар, левилер ве есирликден бошап, Иерусалиме геленлериң әхлиси билен ише башладылар. Левилериң йигрими ве ондан ёкары яшлыларыны Реббиң өйүниң ишине гөзегчилик этмәге белледилер.

⁹ Ешува өз огуллары, гарындашлары билен, Кадмыел хем өз огуллары билен, Яхуданың огуллары – хеммеси бирликде Худайың өйүнде ишлейәнлериң үстүнден гөзегчилик эдйәрдилер. Олара Хенададың огуллары, левилер, оларың огуллары хем-де гарындашлары көмек эдйәрдилер.

¹⁰ Уссалар Реббиң ыбадатханасының дүйбүни тутанларында, Ысрайыл патышасы Давудың гиризен дүзгүнине гөрә, йөрите лыбасларыны гейнен руханылар сурнайлар, Асафың неслинден болан левилер болса кимваллар алып, Реббе алкыш айтмак үчин өңе чыкдылар.

¹¹ Олар Ребби алкышлап, Оңа шүкүр эдип: «Реб ягшы, Онуң Ысрайыла болан сөйгүси бакы» дийип, нагма айтдылар. Ребби алкышланларында, бүтин халк улы шовхун этди, себәби Реббиң өйүниң дүйби тутулыпды.

¹² Эмма улы мәхелләниң шатлык шовхунына гарамаздан, көп адамлар: руханылар, левилер, уругбашылар бу өйүң дүйбүниң тутулышыны гөренлеринде, мөңңүрип агладылар. Себәби олар озалкы өйи өз гөзлери билен гөрүпдилер.

¹³ Шонуң үчинем шатлык шовхуныны адамларың агысындан тапавутландырып болмады. Халк шейле бир шовхун-галмагал эдйәрди велин, оларың шовхуны узаклардан эшидилйәрди.