Ezra 10 - Мукаддес Китап

10-нҗы бап Гарышык никаларың соңуна чыкмак маслахаты

¹ Эзра Худайың өйүниң өңүнде йүзүни ере берип аглап, дилег этди ве гүнәлерини боюн алды. Ысрайыллардан улы мәхелле: эркеклер, аяллар ве чагалар онуң дашына үйшдүлер. Олар хем зар-зар аглашдылар.

² Онсоң Эйлам огулларындан болан Ехиелиң оглы Шеканя Эзра йүзленип: «Биз кесеки халкдан болан аяллара өйленип, Худайымыза бивепалык этдик. Эмма муңа гарамаздан, Ысрайылда энтегем умыт бар.

³ Шонуң үчинем инди, җенабымың ве Худайымызың табшырыкларына сарпа гойянларың маслахаты билен бу аялларың әхлисини ве оларың чагаларыны ковҗакдыгымыз барада өз Худайымыз билен әхт эдишелиң. Гой, бу иш канун боюнча ерине етирилсин.

⁴ Ише гириш, бу сениң борҗуңдыр, биз хем сениң билендирис. Мерт бол-да, бу иши амала ашыр» дийди.

⁵ Онсоң Эзра еринден туруп, руханылара, левилере ве бүтин ысрайыл халкына, оларың шу айдыланы берҗай этҗекдиклерине ант ичирди. Шейдип, оларың хеммеси ант ичдилер.

⁶ Соңра Эзра Худайың өйүниң өңүнден гайдып, Эляшыбың оглы Ехохананың өйүне барды. Ол сүргүнден гайдып геленлериң бивепалыгы үчин яс тутуп, гиҗәни чөрек иймән, сув ичмән гечирди.

⁷ Сүргүнден геленлериң әхлисиниң Иерусалиме йыгнанмалыдыгы барада Яхудада ве Иерусалимде җар чекилди.

⁸ Эгер кимде-ким үч гүнүң ичинде Иерусалиме гелмесе, баштутанларың ве яшулуларың буйругы боюнча, оларың әхли эмләги эллеринден алнып, оларың өзлери хем сүргүнден гелен халкың арасындан чыкарылҗакдыр дийлип ыглан эдилди.

⁹ Онсоң Яхуданың ве Беняминиң әхли адамлары үч гүнүң ичинде Иерусалиме йыгнандылар. Бу докузынҗы айың йигриминҗи гүнүди. Әхли адамлар бу ишиң ваҗыплыгындан ве гүйчли ягышдан яңа галпылдашып, Худайың ыбадатханасының өңүндәки ачык мейданчада отурдылар.

¹⁰ Онсоң руханы Эзра еринден галып, олара: «Сиз кесеки халклардан болан аяллара өйленип гүнә этдиңиз. Сиз Ысрайылың языгыны артдырдыңыз.

¹¹ Инди болса ата-бабаларыңызың Худайы Реббиң өңүнде гүнәлериңизи боюн алып, онуң эрк-ислеглерини ерине етириң. Өзүңизи бу ериң халкларындан ве кесеки халклардан алан аялларыңыздан айры тутуң» дийди.

¹² Муңа бүтин мәхелле гаты сес билен шейле җогап берди: «Догры, биз сениң айданларыңы хөкман ерине етирмелидирис.

¹³ Йөне халк көп, бу вагт ягышам ягып дур, бизиң дашарда дурара меҗалымыз галмады. Бу ишем бир я ики гүнүң иши дәл, чүнки бу бабатда бизиң көпимиз гүнә газандык.

¹⁴ Гой, бизиң баштутанларымыз бүтин мәхелләниң адындан ише гиришсин. Бу иш зерарлы Худайымызың гахар-газабы бизиң үстүмизден совулянча, галаларымызда башга миллетлерден аял аланларың бары өз галаларының яшулулары ве казылары билен биле белленен вагтда гелсинлер».

¹⁵ Муңа диңе Асахелиң оглы Ёнатан билен Тикваның оглы Яхзея гаршы болдулар. Мешуллам билен леви тиресинден болан Шабетай хем олары голдадылар.

¹⁶ Онсоң сүргүнден гайдып геленлер хем оларың ызына эердилер. Руханы Эзра уругларына гөрә уругбашылары сайлады. Оларың хеммесиниң атлары тутулып сайланылды. Онунҗы айың бирине олар бу иши барламага гиришдилер.

¹⁷ Биринҗи айың бирине ченли кесеки халклардан аял алан эркеклере дегишли болан бу барлаг ишини гутардылар.

¹⁸ Руханы несиллериниң арасындан кесеки миллетлерден аял аланлардан тапыланлар шулардыр: Ёсадагың оглы Ешуваның ве онуң доганларының несиллеринден: Магасея, Элигезер, Ярып ве Гедаля.

¹⁹ Олар аялларыны айырҗакдыкларына ант ичип, языклары үчин сүрүден бир гоч алып, язык гурбанлыгыны бердилер.

²⁰ Иммериң несиллеринден Хананы ве Зебадя;

²¹ Харымың несиллеринден Магасея, Элия, Шемагя, Ехиел ве Узыя;

²² Пашхурың несиллеринден: Элёгейнай, Магасея, Ысмайыл, Нетанел, Ёзабат ве Элгаса.

²³ Левилерден Ёзабат, Шимги, Келая (бу Келитадыр), Петахя, Яхуда ве Элигезер;

²⁴ айдымчылардан: Эляшып; дервезебанлардан: Шаллум, Телем ве Уры.

²⁵ Бейлеки ысрайыллардан, Парош несиллеринден Рамя, Йизия, Малкыя, Миямын, Элгазар, Малкыя ве Беная;

²⁶ Эйламың несиллеринден Матаня, Закаря, Ехиел, Абды, Еремот ве Элия;

²⁷ Затуның несиллеринден Элёгейнай, Эляшып, Матаня, Еремот, Забат ве Азыза;

²⁸ Бебайың несиллеринден Ехоханан, Хананя, Забай ве Атлай.

²⁹ Банының несиллеринден Мешуллам, Маллук, Адая, Яшуп, Шеял ве Еремот;

³⁰ Пахатмовабың несиллеринден Адна, Келал, Беная, Магасея, Матаня, Бесалел, Биннуй ве Манаша;

^31-32 Харымың несиллеринден Элигезер, Йишия, Малкыя, Шемагя, Шимгон, Бенямин, Маллук ве Шемаря;

³³ Хашумың несиллеринден Матенай, Матата, Забат, Элипелет, Еремай, Манаша ве Шимги;

^34-37 Банының несиллеринден Магадай, Имран, Увел, Беная, Бедея, Келуху, Ваныя, Меремот, Эляшып, Матаня, Матенай, Ягасай;

^38-42 Биннуйың несиллеринден Шимги, Шелемя, Натан, Адая, Макнадебай, Шашай, Шарай, Азарел, Шелемя, Шемаря, Шаллум, Амаря ве Юсуп;

⁴³ Небоның несиллеринден Егиел, Матытя, Забат, Зебина, Ядай, Ёвел ве Беная.

⁴⁴ Буларың хеммеси кесеки миллетлерден аял алыпдылар. Кәбирлериниң олардан чагалары-да барды.