Эзекиел 4 - Мукаддес Китап

4‑нҗи бап Иерусалимиң габавы хакындакы пыгамберлик

¹ «Сен, эй, ынсан оглы! Өзүңе бир керпич алып, өңүңде гой-да, онуң йүзүне Иерусалим шәхериниң суратыны чек.

² Онуң дашыны габа, гаршысына беркитмелер сал, диварына чыкмак үчин япгыт гур; дүшелгелер дик, төверек-дашында дивар йыкян пүрслер ерлешдир.

³ Онсоң бир демир җам ал-да, демир дивар болар ялы, оны өзүң билен шәхериң арасында ерлешдир; йүзүңи оңа тарап өвүр. Шәхер габавда болар, оны өзүң габарсың. Бу ысрайыл халкы үчин бир аламат болар.

⁴ Онсоң чеп гапдалыңа гышарып ят-да, ысрайыл халкының языгыны өз үстүңде ерлешдир; чеп гапдалыңа гышаран гүнлериңиң санына гөрә оларың языкларыны чекерсиң.

⁵ Мен оларың языкларының хер йылыны бир гүн хасабына өврүп, сениң үстүңе йүкледим. Бу үч йүз тогсан гүндүр. Шейлеликде, ысрайыл халкының языгыны сен чекерсиң.

⁶ Булары гутараныңдан соң, икинҗи гезек гышар, йөне бу гезек саг гапдалыңа гышар. Шейдип, яхуда халкының языгыны чекерсиң. Мен муны хер йылы бир гүн хасабына өврүп, җеми кырк гүни сениң үстүңе йүкледим.

⁷ Йүзүңи Иерусалимиң габавына тарап өвүр-де, голларыңы чермәп, онуң гаршысына пыгамберлик эт.

⁸ Ине, Мен сени танап билен багларын, сен габав гүнлериңи тамамлаянчаң, бир гапдалыңдан бейлеки гапдалыңа өврүлип билмерсиң.

⁹ Бугдай, арпа, нойба, мерҗимек, дары ве човдары алып, бир габа гуй-да, олардан өзүңе чөрек бишир; гапдалыңа гышарҗак гүнлериң санына гөрә үч йүз тогсан гүнләп ондан ий.

¹⁰ Хер гүнки ийҗек иймитиңиң аграмы ярым гадак болар; сен муны белленен вагтда иерсиң.

¹¹ Сувы хем өлчег билен ичерсиң. Ол ярты күйзе болар; оны белленен вагтда ичерсиң.

¹² Арпа көкелер иерсиң; көкелери халкың гөзүниң алнында адам неҗасатыны якып, шонуң үстүнде биширерсиң».

¹³ Реб: «Мениң араларына ковҗак миллетлеримиң ичинде ысрайыл халкы чөреклерини шейдип, харам эдип иерлер» дийди.

¹⁴ Онсоң мен: «Вах, Хөкмүрован Реббим! Мен хич хачан өзүми харам эден дәлдирин, мен яшлыгымдан тә шу вагта ченли хич вагт маслык я парчаланан хайван иймедим, агзыма харам эт дегирмедим» дийдим.

¹⁵ Ол маңа: «Боляр, сен адам неҗасатының дерегине сыгыр тезегини уланыбер, чөрегиңи шонуң үстүнде биширерсиң» дийди.

¹⁶ Соңра Ол сөзүни довам эдип, маңа: «Эй, ынсан оглы! Мен Иерусалимде олары бир дөвүм чөреге зар эдерин. Олар чөреклерини горкы ичинде белленен аграмда иерлер ве сувларыны ховп астында өлчег билен ичерлер.

¹⁷ Онсоң олар чөрек билен сува зар болуп, бири-бирлерине горкы билен середишерлер ве өз этмишлериниң астында хеләк боларлар» дийди.