Эзекиел 2 - Мукаддес Китап

2‑нҗи бап Реб Эзекиел пыгамбери чагыряр

¹ Геплейән сес маңа: «Эй, ынсан оглы, аяк үстүне гал, сениң билен геплешҗек» дийди.

² Ол гепләнде, Рух ичиме гирип, мени аяк үстүне галдырды. Мен Онуң өзүме йүзленип геплейәнини эшитдим.

³ Ол маңа шейле дийди: «Эй, ынсан оглы, Мен сени гаршыма баш гөтерен питнечи миллет болан ысрайыл халкының арасына иберйәрин. Шу гүне ченли олар ве оларың ата-бабалары Маңа гаршы болуп гелдилер.

⁴ Бу халк дикдүшди ве текепбирдир. Мен сени оларың янына иберйәрин. Сен олара: „Хөкмүрован Реб шейле диййәр“ дий.

⁵ Бу питнечи халк сени ислесе диңлесин, ислемесе диңлемесин, йөне олар өз араларында бир пыгамбериң бардыгыны билсинлер.

⁶ Эй, ынсан оглы, сен олардан ве оларың сөзлеринден горкма. Дашыңы чалыдыр тикенеклер гуршаса-да, ичянлар арасында яшасаң-да горкма. Оларың сөзлеринден горкма, йүзлеринден хедер этме, олар питнечи халкдыр.

⁷ Олар сени исле диңлесинлер, исле диңлемесинлер, олара сөзлерими айт, чүнки олар питнечи халкдыр.

⁸ Йөне сен, эй, ынсан оглы, өзүңе айдянларымы диңле. Бу питнечи халк ялы дикдүшди болма, агзыңы ач-да, саңа берҗек задымы ий».

⁹ Онсоң мен өзүме тарап узалян бир эл гөрдүм; ол элде бир дүйрленен кагыз барды.

¹⁰ Оны мениң өңүмде ачып гойды, онуң ики тарапы хем язылгыды, онда агылар, иңңилдилер ве налыш сөзлери язылгыды.