Эзекиел 1 - Мукаддес Китап

1‑нҗи бап Реб Эзекиел пыгамбере аян боляр

¹ Кебар каналының якасында сүргүн эдиленлериң арасындакам, гөклер ачылды ве мен Худайдан гелен гөрнүшлери гөрдүм. Бу сүргүнде болян вагтымызың отузынҗы йылының дөрдүнҗи айының бәшине болды.

² Бу Ёякын патышаның сүргүн эдилмегиниң бәшинҗи йылыды. Дөрдүнҗи айың бәшине

³ бабыллыларың юрдундакы Кебар каналының якасында Бузының оглы Эзекиел рухана Реббиң сөзи аян болды. Ол ерде Реббиң эли онуң үстүндеди.

⁴ Мен демиргазыкдан тупанлы шемалың гелйәнини гөрдүм. Шөхлели, үзнүксиз от сачян әпет булут гелйәрди, одуң ортасында якуда меңзеш бир зат ялпылдаярды.

⁵ Булудың ортасында кешплери ынсана меңзеш дөрт саны җандарың дураныны гөрдүм.

⁶ Оларың херсиниң дөрт йүзи ве дөрт ганаты барды.

⁷ Аяклары гөнүди, дабанлары гөләниң тойнагына меңзейәрди ве ялдыравук бүрүнч кимин шөхле сачярды.

⁸ Ганатларының астындан, дөрт гапдалындан ынсан эллери чыкып дурды. Дөрдүсиниң-де йүзлери ве ганатлары шейледи:

⁹ оларың ганатлары бири-бирине дегип дурды. Җандарлар йөрәнлеринде хич яна өврүлмән, хер хайсы өз тарапына гөни гидйәрди.

¹⁰ Оларың дөрдүсиниң-де йүз кешплери шейледи: өңде дөрдүсиниң-де ынсан йүзи, саг тарапында арслан йүзи, чеп тарапында өкүз йүзи ве ызда бүргүт йүзи барды.

¹¹ Оларың йүзлери шейледи. Ганатлары болса ёкарык герилгиди; хер җандарың ганатларының икиси бири-бирине галташып дурды, бейлеки ики ганаты болса, оларың беденлерини өртйәрди.

¹² Оларың хер бири гөс-гөни херекет эдйәрди. Олар хич яна совулман, Рухуң ислейән угруна гидйәрдилер.

¹³ Бу җандарларың гөрнүши янып дуран одуң көзлерини я-да шамчыраглары яда салярды; от җандарларың ортасында дынгысыз херекет эдйәрди. От шөхле сачярды ве ондан йылдырым чыкярды.

¹⁴ Җандарлар йылдырым чалтлыгында гелип-гидип дурдулар.

¹⁵ Мен җандарлара середенимде, ине, дөрт йүзли җандарларың янында оларың херси үчин ерде бир тигир гөрдүм.

¹⁶ Тигирлериң гөрнүши ве гурлушы шейледи: олар сары якут кимин ялпылдаярды ве дөрдүси-де бири-бирине меңзешди; оларың гөрнүшлери ве гурлушлары тигир ичиндәки тигир ялыды.

¹⁷ Чар тарапа йөрәп билйәрдилер; тигирлер хич яна өврүлмейәрдилер.

¹⁸ Тигирлериң гуршавлары белент хем горкунчды; дөрдүсиниң-де гуршавлары тутушлайын гөзлерден долуды.

¹⁹ Җандарлар йөрәнлеринде, тигирлер-де оларың яны билен йөрейәрдилер; җандарлар ерден галанларында, тигирлер-де биле ерден галярдылар.

²⁰ Рух нирә гитмек ислесе, олар-да шол яна гидйәрдилер. Җандарларың рухы тигирлердедиги үчин, тигирлер-де олар билен биле ерден галярдылар.

²¹ Җандарлар йөреселер, тигирлер-де йөрейәрдилер; җандарлар дурсалар, тигирлер-де дурярдылар. Җандарларың рухы тигирлердедиги үчин, олар ерден галанларында, тигирлер-де биле галярдылар.

²² Гүммезе чалымдаш, буз ялы ялдыраян горкунч бир зат җандарларың келлелериниң үстүне яйылыпды.

²³ Гүммезиң ашагында оларың ганатлары бири-бирине тарап герилги ягдайда гөнелип дурды. Оларың херсиниң беденини өртйән башга-да ики ганаты барды.

²⁴ Олар йөрәнлеринде, ганатларындан чыкян сеси эшитдим: җошуп акян сувларың шаггылдысы, Гудратыгүйчлиниң сеси ве улы гошуның гүрпүлдиси ялыды. Олар дуранларында, ганатларыны ашак гойберйәрдилер.

²⁵ Ганатларыны ашак гойберенлеринде, келлелериниң үстүндәки гүммезден бир сес гелйәрди.

²⁶ Гүммезиң депесинде якут гөрнүшли тагтың кешби барды; тагтың кешбиниң үстүнде ынсан гөрнүшинде бир кешп барды.

²⁷ Мен кешбиң билинден ёкардакы гөрнүшини гөрдүм, ол ичи тутушлайын от гөрнүшли ялдыраян якут киминди, кешбиң билинден ашакдакы гөрнүшини-де гөрдүм, ол от дейин парлап, төверек-даша шөхле сачып дурды.

²⁸ Даш-төверекдәки шөхләниң гөрнүши ягышлы гүн булутда пейда болан әлемгошар киминди. Бу Реббиң шөхратының гөрнүшиниң кешбиди. Мен муны гөрен бадыма йүзин йыкылдым ве кимдир бириниң геплейән сесини эшитдим.