Eýýup 8 - Мукаддес Китап

8‑нҗи бап Билдат Эйюба җогап берйәр

¹ Онсоң шувалы Билдат шейле дийди:

² «Хачана деңеч шейле гүрлеҗек? Агзыңдан чыкян сөзлер гүйчли шемал дей дерексиз.

³ Хей-де, Худай адалаты бозянмыдыр? Гудратыгүйчли хакыкаты ёйянмыдыр?

⁴ Огулларың Худая гаршы гүнә эден болсалар, Худай-да олара языкларына гөрә җеза берендир.

⁵ Эгер Худайы агтарсаң, Гудратыгүйчлә ялбарсаң,

⁶ пәк ве догручыл болсаң, элбетде, Ол сениң үчин аяга галар, сылаглап, хоҗалыгыңы дикелдер.

⁷ Өңүң уҗыпсыз-да болса, соңуң бейик болар.

⁸ Овалкы несиллерден сора-да, оларың ата-бабаларының дерңевине назар сал.

⁹ Чүнки биз дүйнкилердирис, билйән задымыз ёкдур, ердәки өмрүмиз көлеге киминдир.

¹⁰ Олар саңа өвретмезлерми, айтмазлармы, йүреклериндәки сөзлери диле гетирмезлерми?

¹¹ Батгасыз ерде гаргы битерми? Сувсуз ерде гамыш өсерми?

¹² Олар энтек гөккә, орулманка, отлардан өң гураярлар.

¹³ Худайы унудан хер кесиң соңы-да шейле гутарар, худайсызың умыды өлер.

¹⁴ Бил баглаяны берк дәлдир, даяняны мөйүң кереби киминдир.

¹⁵ Өйүне сөенйәр, йөне ол йыкылар, оңа берк япышяр, йөне ол чагшар.

¹⁶ Худайсызлар гүнешде гүллейән өсүмлик кимин, оларың шахалары тутуш бага яйраяр.

¹⁷ Көклери даш үйшмеклериниң дашына оралып, дашларың арасында ятяндыр.

¹⁸ Эгер ерлеринден гопарылса, ер инкәр эдип: „Сени гөрмедим“ диер.

¹⁹ Шады-хоррамлыгы узага чекйән дәлдир оларың, оларың ерини башгалар тутарлар.

²⁰ Худай акйүреклини терк этмез, пислик эдйәне ярдам бермез.

²¹ Ол ене агзыңы гүлкүден, леблериңи шадыян оваздан долдурар.

²² Душманларың уяда галар, яманларың чадыры вейран болар».