Eýýup 5 - Мукаддес Китап

5‑нҗи бап Элипаз сөзүни довам эдйәр

¹ «Ханы, чагыр, җогап берен тапылармыка? Сен перишделериң хайсына йүзленҗек?

² Акмагы гахар-газап өлдүрйәр, наданы габанҗаңлык ёк эдйәр.

³ Көк урян акмаклары гөрдүм, эмма оларың өйлери дуйдансыз нәлетленди.

⁴ Чагалары ховпсузлыкдан узакдыр, адалатдан махрум эдилйәрлер олар, ховандарлык эдйән ёкдур олара.

⁵ Ачлар акмакларың хасылыны иййәрлер, оны тикенлериң арасындан йыгып алярлар, ачгөзлер байлыкларыны ювудярлар.

⁶ Чүнки мушакгатлык топракдан чыкмаз, хасрат-да ерде битмез.

⁷ Учгуның ёкарык учушы дек, ынсан хасрат үчин догуляр.

⁸ Мен болсам Худая йүз тутардым, давамы Оңа табшырардым.

⁹ Ол акыла сыгмаҗак, бейик ишлери эдйәр, сан-саҗаксыз гудратлары гөркезйәр.

¹⁰ Ер йүзүне ягыш ягдырып, мейданлары суварян-да Олдур.

¹¹ Ол кемсидиленлери арша чыкаряр, гуссалылар ховпдан дыняр.

¹² Хилегәрлериң ниетлерини бозяр Ол, гуран хилелерини пуҗа чыкаряр.

¹³ Акыллысыраяны өз хилесинде тутяр, мекирлериң маслахаты еле совруляр.

¹⁴ Гүндизлери гараңкылыга өврүлип, гүндизиң гүнортаны гиҗе дек сермешип гезйәрлер.

¹⁵ Ол мәтәчлери гылычдан, гүйчлүлериң дилинден хем элинден халас эдйәр.

¹⁶ Шейдип, пукараларда умыт боляр, адалатсызлык агзыны юмяр.

¹⁷ Гөр, нәхили багтлы Худайың тербиелейәни! Гудратыгүйчлиниң теммисини рет этме.

¹⁸ Чүнки яралаян-да Ол, сараян-да Ол, шикес етирйән-де Ол, шыпа берйән-де Ол.

¹⁹ Ол сени алты бетбагтчылыкдан гутарар, единҗиден-де саңа зыян етмез.

²⁰ Ол сени ачлыкда өлүмден, урушда гылычдан гутарар.

²¹ Ол сени дузлы дилден горар, гыргын геленде, сен горкмарсың.

²² Гыргының, ачлыгың үстүнден гүлерсиң, ябаны хайванлардан хедер этмерсиң.

²³ Мейдан дашлары билен дил тапышарсың, ябаны хайванлар билен агзыбир боларсың.

²⁴ Чадырыңың асудалыкдадыгыны билерсиң, сүриңе гөз айлаңда, саны түкел болар.

²⁵ Сан-саҗаксыз несил гөрерсиң, зүрятларың яйладакы отлар кимин болар.

²⁶ Өз мөвсүминде хармана йыгналян галла десселери дек сен хем габра гоҗалып гирерсиң.

²⁷ Дерңев гечирдик, бу хакыкатдыр, муны диңле-де, өзүң үчин белләп ал».