Eýýup 42 - Мукаддес Китап

42‑нҗи бап Эйюп тоба эдйәр

¹ Онсоң Эйюп Реббе шейле җогап берди:

² «Мен билйән, Сениң элиңден хемме зат гелйәр, гөвнүңе гелен зады амала ашыряң.

³ Несихатыңы гаралаҗак бармы? Шонуң үчинем мен дүшүнмедик, асла акыл етирип билмедик затларым барада гепледим.

⁴ Инди маңа гулак ассана, мен геплеҗек, Сенден сорайын, маңа җогап берсене.

⁵ Сен хакда гулагым билен эшидипдим, инди Сени өз гөзлерим билен гөрдүм.

⁶ Мунуң үчин өзүми йигренип, башымдан гумдур күл совруп тоба эдйәрин».

Эйюбың тәзе дурмушы

⁷ Реб Эйюп билен гүррүңини тамамландан соң, тейманлы Элипаза йүзленип, шейле дийди: «Мениң саңа ве сениң бейлеки ики достуңа гаршы газабым ловлаяр, чүнки сиз гулум Эйюп ялы Мен барада хакыкаты сөзлемедиңиз.

⁸ Шонуң үчин хем инди еди өкүз билен еди гочы алың-да, гулум Эйюбың янына барып, өзүңиз үчин якма гурбанлыгыны хөдүр эдиң. Гулум Эйюп сизиң үчин дилег эдер. Мен сиз билен акмаклыгыңыза гөрә иш салышмарын, онуң дилегини кабул эдерин, чүнки сиз Мен барада хакыкаты гулум Эйюп ялы сөзлемедиңиз».

⁹ Шейдип, тейманлы Элипаз, шувалы Билдат хем-де нагамлы Сопар Эйюбың янына гидип, Реббиң табшырышы ялы хем этдилер. Реб Эйюбың дилегини кабул этди.

¹⁰ Эйюп достлары үчин дилег эденден соң, Реб оңа бар затларыны ызына гайтарып берди. Реб оңа өңкүсинден ики эссе көп зат берди.

¹¹ Онсоң әхли доганларыдыр уялары ве өңки танышлары Эйюбы гөрмәге гелип, өйүнде биле чөрек ийдилер. Онуң башына Реббиң гетирен белалары үчин дуйгудашлык билдирип, оңа теселли бердилер. Оларың херси Эйюба бир бөлек күмүш билен алтын йүзүк бердилер.

¹² Реб Эйюбың соңкы дурмушыны өңки дурмушындан-да хас берекетли этди. Онуң он дөрт мүң гоюн-гечиси, алты мүң дүеси, мүң җүбүт өкүзи ве мүң уркачы эшеги барды.

¹³ Шейле хем еди оглы, үч гызы барды.

¹⁴ Биринҗи гызының ады Емима, икинҗисиниң ады Кесия, үчүнҗисиниң ады Керенхаппукды.

¹⁵ Дүнйәниң хич бир күнҗегинде Эйюбың гызлары ялы гөрмегей гызлар ёкды. Какалары эркек доганлары билен бирликде олара-да мирас берди.

¹⁶ Мундан соң Эйюп йүз кырк йыл яшап, чагаларыны, дөрт арка ченли агтык-човлук гөрди.

¹⁷ Шейдип, Эйюп гоҗалып, дурмушдан разы болуп дүнйәден өтди.