Eýýup 41 - Мукаддес Китап

41‑нҗи бап

¹ Оны тутмак умыды нетиҗесиздир, гарасыны гөрениң горкудан йүреги ярылар.

² Оны оярып билҗек йүрекли адам ёкдур. Ким Мениң өңүмде дуруп билҗек?

³ Ким Менден хасабат бермегими сораяр? Гөгүң астындакы бар зат Мениңкидир.

⁴ Ливятаның беден агзалары, бейик гүйҗи ве гөзел сыраты барада дыммарын.

⁵ Ким онуң совудыны чыкарып билер? Ким оңа яраг билен голайлап билер?

⁶ Ким онуң агзыны ачмага йүрек эдер? Агзындакы дишлери горкунчдыр.

⁷ Аркасы ыкҗам мөхүр билен мәкәмленен, хатар-хатар галканлар билен өртүлен.

⁸ Олар бири-бирлерине шейле якын велин, хатда араларындан хова гечмейәр.

⁹ Бирек-биреклерине япышдырылгыдыр олар, мәкәм сепленендирлер, олары айрып болмаз.

¹⁰ Асгыранда от сачяр, гөзлери даң шапагы кимин янып дур.

¹¹ Агзындан ялын чыкяр, от учгунлары сычраяр.

¹² Бурнуның дешиклеринден гайнаян газан, янян гамыш кимин түссе чыкяр.

¹³ Деми көмүрлери көредйәр, агзындан алав чыкяр.

¹⁴ Гүйч онуң бойнундадыр, горкы онуң хузурында танс эдйәр.

¹⁵ Этиниң гатлары бири-бирине япышып, эндамында беркән, ол гымылдамаяр.

¹⁶ Йүреги даш кимин гаты, дегирмен дашы кимин гатыдыр.

¹⁷ Ол еринден галанда, гүйчлүлер лерзана гелйәр, горкудан яңа титрәп, өзлерини йитирйәрлер.

¹⁸ Оңа гылыч кәр этмез, найза, ханҗар ве ок өтмез.

¹⁹ Ол демри саман, бүрүнҗи чүйрүк агач сайяр.

²⁰ Атылан окдан гачмаз, сапан дашлары оңа саман овнугы киминдир.

²¹ Сердесселери саман сайяр, өзүне тарап зыңлан найзалара гүлйәр.

²² Гарнының асты гыйчак күйзе дөвүклери киминдир, палчыгың үстүне дөвек кимин ыз галдырар.

²³ Чуңлугың сувларыны газан кимин гайнадяр, деңзи мелхем гайнадылян габа дөндерйәр,

²⁴ ызында парлак ыз галдыряр, деңиз агаран сача меңзедилйәр.

²⁵ Бүтин әлемде онуң деңи-тайы ёкдур, бу махлук горкы-үркини билйән дәлдир.

²⁶ Ол әхли җандарларың ичинде иң текепбиридир, йыртыҗы хайванларың иң бойнуёгыныдыр».