Eýýup 40 - Мукаддес Китап

40-нҗы бап Реб сөзүни довам эдйәр

¹ Реб харасадың ичинден шейле җогап берди:

² «Эркек кимин билиңи берк гуша, сени сораг этҗек, Маңа җогап бер.

³ Мени адалатсызлыкда айыплаҗакмы сен? Өзүңи акламак үчин Мени хөкүм этҗекми инди?

⁴ Худайың гүйҗи ялы гүйҗүң бармы? Онуңкы ялы гүңлеч сесиң бармы?

⁵ Өзүңи шан-шөхрат ве белент мертебе билен безе, шөхрат ве хормат донуны гей.

⁶ Мөвч алян газабыңы дөк, текепбирлере бакып, олары боюн эгдир.

⁷ Текепбирлере гарап, олары дыза чөкер, эрбетлери дуран ерлеринде мынҗырат.

⁸ Хеммесини биле топрага гөм, олары габырда багла.

⁹ Шонда саг элиңиң сени халас эдип билҗегини Мен-де боюн аларын.

¹⁰ Ине, Бәхемоса серет, сени ярадышым кимин, оны-да Мен яратдым, ол өкүз кимин от иййәр.

¹¹ Гөр, онуң билинде нәхили гүйч бар, гарнындакы мускуллары нәхили гүйчли!

¹² Гуйругыны кедр агаҗы кимин саллаяр, будуның сиңирлери өрүм-өрүмдир.

¹³ Сүңклери бүрүнч турбалар кимин, гапыргалары демир гөзенеклери киминдир.

¹⁴ Бәхемос Худайың бейик ишлериниң арасында иң аҗайыбыдыр, диңе Яраданы оңа гылыч билен голайлашып билер.

¹⁵ Байырлар онуң отлагыдыр, ол ерде хайванлар яйнашярлар.

¹⁶ Ол гырымсы агачлар астында, гамышлык билен өртүлен батгалыкда ятяр.

¹⁷ Гырымсы агачлар үстүне көлеге саляр, дерәниң сөвүтлери оны гуршаяр.

¹⁸ Деря җошса-да, ол эйменмез, Иордан дашып, агзына-бурнуна гелсе-де, ол асла әвмез.

¹⁹ Ким оны гарбак билен тутуп билҗек? Ким чеңңек билен онуң бурнуны дешип билҗек?

²⁰ Ливятаны чеңңек билен тутуп билермиң? Я-да онуң дилине сыртмак салып билермиң?

²¹ Бурнундан йүп гечирип билермиң? Я-да әңинден чеңңеги өтүрип билермиң?

²² Ол саңа ялбарып-якарармыка? Ширин сөзлери билен сени ырармыка?

²³ Өзүни эбедилик гулуң эдериң ялы, сең билен әхт баглашармыка?

²⁴ Гуш билен ойнайшың ялы онуң биленем ойнармыкаң? Оны гызларыңа гүйменҗе эдип баглап билермиң?

²⁵ Тәҗирлер оны алып-сатып билермикәлер? Сөвдагәрлер оны өз араларында пайлашып билермикәлер?

²⁶ Дерисини найза билен, келлесини балыкчыларың гадалгасы билен дешим-дешим эдип билермиң?

²⁷ Оңа элиңи дегрип гөр, ол саңа гөз гөркезмезмикә, сен оны икиленч гайталамарсың.