Eýýup 4 - Мукаддес Китап

4‑нҗи бап Элипаз җогап берйәр

¹ Тейманлы Элипаз сөзе башлап, шейле дийди:

² «Сениң билен сөзлешмәге сынанышсак, саңа агыр дегмезми? Геплемекден сакланып билйән бармы нәме?

³ Ине, сен көплере тәлим бердиң, эҗизлере медет бердиң.

⁴ Сөзлериң бүдрейәнлере голдав болды, икирҗиңленйәнлери беркитдиң.

⁵ Эмма инди өз башыңа геленде, рухдан дүшйәң, бела учраңда, өзүңи йитирйәң.

⁶ Ынамың Худайдан горкмакда, умыдың пәк дурмушда дәлми?

⁷ Ядыңа сал, хей, бигүнәниң ёгаланы бармы? Догручылларың хеләк боланы бармы?

⁸ Гөршүме гөрә пислик сүрүмини гечирип, хасраты экйәнлер, шоны-да оряндырлар.

⁹ Олар Худайың деми билен хеләк болярлар, Онуң газабы билен ёк болярлар.

¹⁰ Арсланың аррылдысы, газаплы шириң сеси кесилйәр, чага арсланларың дишлери сындырыляр.

¹¹ Гүйчли арслан авсызлыкдан хеләк боляр, эне арсланың чагалары пытрадыляр.

¹² Маңа гизлинликде бир сөз гелди, гулагыма бир пышырды илди.

¹³ Гиҗеки гөрнүшлерден дөрән пикирлер ичинде, ынсанлары агыр укы басян махалында,

¹⁴ мени горкы, титреме гаплады, бүтин беденим сарсды.

¹⁵ Бир рух йүзүми сырып гечип гитди, эндамымың түйлери сых-сых болды.

¹⁶ Ол үмсүм дурды, йөне онуң кешбини сайгарып билмедим. Гөзүмиң алнында бир сырат дурды, үмсүмликди, соң бир сес эшитдим:

¹⁷ „Хей-де ынсан Худайдан догры болуп билерми? Ынсан өз Ярадыҗысындан пәк болуп билерми?

¹⁸ Ол хатда Өз гулларына ынам этмейәр, Өз перишделеринден ялңышлык тапяр.

¹⁹ Онсоң Ол топракдан ярадылан ынсана ненең ынам этсин! Оларың эсасы тоздандыр, олар гүеден тиз гырыляндырлар.

²⁰ Эртир билен агшам аралыгында йитирим болярлар, хич кимиң гөзүне илмән эбеди ёк болярлар.

²¹ Оларың өмүр танаплары кесилип, дүнйәден пайхассыз өтүп гидйәрлер“».