Eýýup 39 - Мукаддес Китап

39-нҗы бап

¹ Даг гечилериниң хачан гузлаяныны билйәңми? Кейиклери гузлаян вагты сынлаяңмы сен?

^2-3 Олар бүкүлип, бургусы тутуп, чагаланда, оларың нәвагт айларының долуп, гузламалы пурсадыны билйәңми?

⁴ Балалары чөлде өсүп, гүйч аляр, чыкып гидип, ызларына доланмазлар.

⁵ Гуланы бошадып гойберен ким? Гуланы душагындан бошадан ким?

⁶ Олара чөллери өй, шор ерлери месген эдип бердим.

⁷ Ол шәхериң галмагалына гүлйәр, мал сүрйәниң гыкылыгыны эшитмейәр.

⁸ Өри үчин депелерде энтейәр, гөк отлук агтаряр.

⁹ Ябаны өкүз саңа хызмат этмәге разы болармыка? Гиҗәни сениң ахырыңың башында гечирермикә?

¹⁰ Ер сүрдүрмек үчин ябаны өкүзе боюнтырык салып билермиң? Я-да ол сениң ызыңдан ерлере мала басармыка?

¹¹ Онуң бейик гүйҗүне бил баглап билермикәң? Агыр ишиңи оңа табшырып билермикәң?

¹² Ябаны өкүзиң хасылыңы йыгнап, харманыңа үйшүрҗекдигине ынамың бармы?

¹³ Леглегиңки кимин ганат-пери болмаса-да, дүегуш бегенчли ганат какяр.

¹⁴ Дүегуш ерде юмуртгалаяр, олары гумда йыладяр.

¹⁵ Юмуртгаларың аяк астында енҗилҗегини, ябаны хайванларың олары басгылаҗакдыгыны унудяр.

¹⁶ Балаларыны эдил кесекиниңки кимин забун тутяр, зәхметиниң бидерек болҗагындан хедер этмейәр.

¹⁷ Чүнки Худай оны пайхасдан махрум эдендир, оңа аң бермәндир.

¹⁸ Эмма дүегуш ганат яйып ылганда, атың ве чапыксуварының үстүнден гүлйәр.

¹⁹ Бедеве гүйч-кувват берйән сенми? Онуң бойнуна ялы битирйән сенми?

²⁰ Сенми оны чекиртге кимин бөкдүрйән? Кишңәнде, айылганчдыр онуң сеси.

²¹ Газаплы ер пешәп, гүйҗүне буйсаняндыр, душманың үстүне окдурыляр.

²² Горка гүлүп, хич затдан хедер этмейәр, гылычдан хем гачмаяр.

²³ Сагдак, ялпылдавук найза ве ханҗар оңа дегип, зарңылдап, ызына атыляр.

²⁴ Буйсанчдан мөвч алып, эсли аралыга чапяр, үмсүм дурмаз ол сурнай сесине.

²⁵ Сурнай сеси яңлананда, ол кишңейәр, сөвеш ысыны, серкерделериң гох-галмагалыны, сөвеш гыкылыкларыны узакдан дуйяр.

²⁶ Гыргы сениң пайхасың билен гөкде гайып, ганатларыны яйып, гүнорта тарап учярмы?

²⁷ Бүргүт сениң буйругың билен гөге галып, белентликде хөвүртге ясанярмы?

²⁸ Ол учут гаяларда яшап, олары өзүне гала эдинйәр.

²⁹ Авуны шол ерден гөзлейәр, гөзлери авуны узакдан гөрйәр.

³⁰ Балалары гандан иймитленйәрлер, ниреде ләш болса, олар шол ердедир».

³¹ Реб Эйюба шейле дийди:

³² «Гудратыгүйчли билен җеделлешен Оңа дүзедиш берерми? Худай билен давалашян җогап берсин».

³³ Эйюп Реббе шейле җогап берди:

³⁴ «Вах, мен бир санда ёк адам, Саңа нәме җогап берейин? Агзыма бек боларын инди.

³⁵ Көп гезек гепледим, йөне менде җогап ёк, мундан артык геплемен инди».