Eýýup 37 - Мукаддес Китап

37‑нҗи бап

¹ Гүммүрдә йүрегим галпылдап, агзымдан чыкып гелйәр.

² Диңләң Онуң гүммүрдейән сесини, агзындан чыкян овазы эшидиң.

³ Йылдырымы гөгүң астындакы әхли ере, ер йүзүниң дөрт күнҗегине иберйәр.

⁴ Онсоң Онуң гүңлеч сеси эшидилйәр, Ол гөк кимин гүммүрдейәр, Өз бар сесине сесленйәр.

⁵ Худайың сеси тәсин гүррүлди берйәр, бизиң акыл етиреримизден хас бейик ишлери эдйәр.

⁶ Чүнки Ол гара „яг“ дийип, ягша-да „гүйчли яг“ дийип буйрук берйәр.

⁷ Мунуң үчин әхли ынсанларың иши тогтадыляр, олар Онуң бейик ишлерини шонда билерлер.

⁸ Хайванлар өз хинлерине гирйәрлер, өз сүренлеринде галярлар.

⁹ Харасат өз меканындан чыкяр, совук гүйчли елден гелйәр.

¹⁰ Худайың демине буз эмеле гелип, сув гиңишликлери доңяр.

¹¹ Худай булутлары ыгалдан долдурып, оларың арасындан йылдырымы ере пытрадяр.

¹² Онуң буйругына гөрә, бүтин ер йүзүне айланярлар, Худайың буйрукларына боюн болярлар.

¹³ Я ынсанлары җезаландырмак үчин, я-да ер йүзүни суварып, Өз сөйгүсини гөркезмек үчин, Ол ягыш ягдыряр.

¹⁴ Эйюп, диңле муны, тогта-да, Худайың бейик ишлери хакында пикирлен.

¹⁵ Худайың булутлары нәхили доландыряныны, нәдип йылдырым чакдыряныны билйәңми?

¹⁶ Булутларың деңаграмлылыгыны, кәмил Билимлиниң тәсин ишлерини билйәңми?

¹⁷ Ер йүзүне гүнорта ели өвүсйән мөвсүмде, эшиклери ыссыдан эндамына япышян сен,

¹⁸ гуйма бүрүнч айна дек берк болан асманы Худай билен биле гуюп билермиң?

¹⁹ Худая нәме диймелидигини бизе өврет, сөзүмизи беян эдип билмейәрис, чүнки биз гараңкылыкда.

²⁰ Гүрлешмек ислейәними Худая айтмалымы? Ювудылмак ислейән бармы?

²¹ Шемал гечип, булутлар сырыланда, гөкде парлаян нура хич ким середип билмез.

²² Худай демиргазыкдан алтын шөхле сачып гелйәр, Ол гудратлы шөвкете бесленендир.

²³ Гудратыгүйчли элъетмез, гудратда бейикдир, Ол адылдыр, догрулыкда бейикдир, Ол хич зулум этмейәр.

²⁴ Шонуң үчинем ынсанлар Ондан горкярлар, Худай оларың пайхасына үнс бермейәр».