Eýýup 36 - Мукаддес Китап

36-нҗы бап Элиху Худайың гүйҗүни беян эдйәр

¹ Элиху сөзүни довам эдип, шейле дийди:

² «Бираз сабыр эт, мен саңа дүшүндирейин, Худай үчин айтмалы сөзүм бар.

³ Билимими дүрли чешмелерден топлап, Яраданымың адылдыгыны субут эдерин.

⁴ Догруданам, сөзлерим ялан дәл, гаршыңда дуран билимде кәмилдир.

⁵ Элбетде, Худай гудратлы, хич кими кемситмейәр Ол, Ол пайхасда гудратлыдыр.

⁶ Эрбетлери дири гоймаз Ол, эзиленлере адалатлылык берйәр.

⁷ Догрулардан гөзүни айырмаз, олары шалар билен тагтда отурдып, мертебелерини эбедилик бейгелдйәр.

⁸ Догручыллар зынҗыр билен багланып, азап дузагына дүшүрилен болсалар,

⁹ Худай гөдек ишлерини, языкларыны олара аян этмеги үчиндир.

¹⁰ Өвүт-үндевини диңледип, писликден дөнмеклиги буюряр.

¹¹ Олар Худая гулак салып, Оңа хызмат этселер, гүнлерини хошвагтлыкда, йылларыны шады-хоррамлыкда гечирерлер.

¹² Гулак асмасалар, гылычдан хеләк боларлар, дүнйәден пәхим-пайхассыз өтүп гидерлер.

¹³ Худайсызлар гахар-газабы ичинде саклаярлар, Худай олары җезаландырса-да, Ондан ярдам дилемейәрлер.

¹⁴ Яшлыкда өлүп гидйәрлер, өмүрлери азгынлыкда гутаряр.

¹⁵ Худай эзиленлери азапларындан гутаряр, мушакгатлылара Өзүни эшитдирйәр.

¹⁶ Ол сени хем дертден азат эдип, чәксиз гиңишлиге чыкарды, сачагыңы нәз-ныгматлардан долдурды.

¹⁷ Инди сен эрбетлере хак болан җезаны чекйәң, хөкүмден ве адалатдан гутулып билмерсиң.

¹⁸ Сак бол, байлык билен алданайма, пара гызыгып, ёлдан чыкайма.

¹⁹ Байлыгың, эгсилмез гүйч-гайратың сени дертден гутарып билерми?

²⁰ Халкларың ер йүзүнден ёк эдилҗек гиҗесини арзув этме.

²¹ Сересап бол! Писликден йүз өвүр, сени гүнәден сакламак үчин мушакгатлык иберилди.

²² Худайың гудраты бейикдир, Онуң ялы тәлим берйән бармыдыр?

²³ Худая нәме этмелидигини өвреден ким? Ким Оңа: „Эдениң телек“ дийип билйәр?

²⁴ Худайың ишлерини өвмеги унутма, ынсанлар бу хакда айдым айтдылар.

²⁵ Бүтин ынсанлар Худайың ишлерини гөрди, хер кес оңа узакдан середйәр.

²⁶ Худай, хакыкатданам, бейикдир, Онуң бейиклигине долы дүшүнип билмейәрис, Онуң өмүр йыллары акыла сыгмаз.

²⁷ Худай сув дамҗаларыны гөге йыгнап, ягыш дамҗаларына өвүрйәр.

²⁸ Булутлардан ягыш ягяр, ынсанларың үстүнден бол ягмыр ягдыряр.

²⁹ Булутларың яйрадылышына, асманың гүбүрдисине дүшүнип билйән бармы?

³⁰ Худай гөкде йылдырым чакдыряр, деңизлериң дүйбүне ченли өртйәр.

³¹ Худай халкы шейле доландыряр, олары болелин иймит билен үпҗүн эдйәр.

³² Йылдырымы Өз элинде саклап, Өз беллән еринде чакмагы буюряр.

³³ Гөк гүммүрдиси апы-тупаның етип гелйәндигини дуйдуряр, хатда мал-гара апы-тупаның етип гелйәнини билдирйәр.