Eýýup 34 - Мукаддес Китап

34‑нҗи бап Элиху Эйюбы гүнәкәрлейәр

¹ Элиху сөзүни довам эдип, шейле дийди:

² «Эй, акылсумаклар, сөзлериме гулак гоюң, эй, билимсеклер, мени диңләң.

³ Дилиң нахарың тагамыны дадышы ялы, гулак хем сөзлери барлаяр.

⁴ Гелиң, хакыкаты сайлалың, ягшыны бирликде өвренелиң.

⁵ Чүнки Эйюп: „Мен бигүнә, Худай мени хакымдан махрум этди.

⁶ Мен хак болсам-да, яланчы сайылярын, языксыз болсам-да, дердиме эм ёк“ дийди.

⁷ Эйюп ялы адам бармы? Ол яңсыламаны сув дек ичйәр.

⁸ Пислик эдйәнлер билен үлпет болуп, эрбетлер билен тиркешйәр.

⁹ Чүнки Эйюп: „Худайы хошнут этмек ынсана пейда бермез“ диййәр.

¹⁰ Муңа гөрә, эй, билимсеклер, маңа гулак асың, хей-де, Худай пислик эдерми? Гудратыгүйчли нәхаклык эдерми?

¹¹ Худай ынсанларың этмишлерини башларындан индерер, олара өз пәлинден тапдырар.

¹² Догрусы, Худай хич хачан пислик этмез, Гудратыгүйчли адалаты ёймаз.

¹³ Оңа бүтин ер йүзүниң үстүнден хөкмүрованлыгы берен ким? Бүтин дүнйәни Онуң ыгтыярында гоян ким?

¹⁴ Худай ниет эдип, Өз рухуны, демини ызына алса,

¹⁵ бүтин адамзат хеләк болар, ынсанлар ене топрага өврүлерлер.

¹⁶ Дүшүнҗәң болса, диңле, сөзүме гулак гой.

¹⁷ Адалаты йигренйән хөкүм сүрүп билерми? Догручылы, гудратлы Боланы язгарҗакмы?

¹⁸ Ол патыша: „Сен дейюс“, беглере: „Сиз пис“ диййәр.

¹⁹ Хан-беглерден йүз гөрмейәр, байы гарыпдан ёкары тутмаяр, чүнки хеммелер Онуң элиниң яраданыдыр.

²⁰ Олар гөз юмуп-ачасы салымда өлйәрлер, адамлар гиҗе лерзана гелип, дүнйәден өтйәрлер, гүйчлүлер хем ынсан эли дегмезден ёк болярлар.

²¹ Худайың гөзлери ынсанларың ёлуна дикилгидир, Ол ынсанларың хер әдимини гөрйәр.

²² Пислер гизленер ялы, не гараңкылык, не-де түм гараңкылык бар.

²³ Өз хузурына хөкүме гелсинлер дийип, ынсанлара гүн беллемек герек дәл Худая.

²⁴ Худай барламаздан гүйчлүлери гырып, ерлерине башгалары гойяр.

²⁵ Худай оларың этмишлерини билип, бир гиҗеде олары агдаряр, олар эзилйәрлер.

²⁶ Худай олары пислиги үчин хеммәниң гөзүниң алнында җезаландыряр.

²⁷ Чүнки олар Онуң ызына эермедилер, Онуң ёлларыны әсгермезлик этдилер.

²⁸ Гарыпларың наласы Худая барып етди, Ол эзиленлериң наласыны эшитди.

²⁹ Йөне Худай үмсүм болса, ким Оны язгарып билер? Ол йүзүни гизлесе, ким Оны гөрүп билер? Миллет болсун, адам болсун, пархы ёк,

³⁰ худайсыз адам шалык сүрүп, халка дузак гурмасын.

³¹ Худая: „Җезамы чекдим, инди пис иш этмерин.

³² Гөрмейәними маңа өврет, этмиш эден болсам, инди гайталаман“ диениңиз бармы?

³³ Худай ислейшиңе гөрә саңа адалатлылык берсинми? Сен Оны рет этдиң. Сен карара гелмелисиң, мен дәл, шонуң үчин билйәниңи айт.

³⁴ Дүшүнҗеси боланлар, мени диңлейән акылдарлар:

³⁵ „Эйюп билмезден гүрлейәр, онуң сөзлери манысыз“ диерлер.

³⁶ Эрбетлер ялы җогап гайтаряндыгы үчин, Эйюп ахыра ченли сынагда болсун!

³⁷ Чүнки ол гүнәсине гүнә гошяр, арамызда кинаялы эл чарпып, Худая гаршы гепини көпелдйәр».