Eýýup 31 - Мукаддес Китап

31‑нҗи бап Эйюп өз айыпсызлыгыны тассыклаяр

¹ «Бой гыза гыя гөз билен бакмаҗагыма ант ичдим.

² Чүнки ёкардакы Худайдан пайым недир, гөкдәки Гудратыгүйчлүден мирасым недир дийип пикир этдим.

³ Эрбетлериң башындан бетбагтчылык, пислик эдйәнлериң башындан бела инмейәрми?

⁴ Ол йөрейән ёлларымы гөрүп, хер әдимими ызарлаяр.

⁵ Мен ялан сөзләп, хилегәрлиге йүз уран болсам,

⁶ Худай адыл хөкүм этсин, мениң пәкдигими билсин.

⁷ Аягым ёлдан чыкан болса, йүрегим гөзүме эерен болса, эллериме гара ёкдуран болсам,

⁸ гой, экеними башгалар ийсин, экиним көки билен согрулсын.

⁹ Йүрегими бир аяла алдыран болсам, гоңшымың гапысында букуда ятан болсам,

¹⁰ гой, аялым башганың бугдайыны үвесин, гой, оңа башга эркеклер янашсын.

¹¹ Чүнки бу азгынлыкдыр, хөкүм эдилмели җенаятдыр.

¹² Бу хеләкчилик ерине ченли якян от, бар экиними көки билен якар ол.

¹³ Гулум я-да гырнагым маңа арз-шикаят эденде, мен олара адалатсызлык эден болсам,

¹⁴ Худай аяга галанда, мен нәме эдерин? Ол хасап соранда, Оңа нәме җогап берерин?

¹⁵ Энемиң гөвресинде мени ярадан, олары-да яратмадымы нәме? Гөвреде бизе шекил берен бир Худай дәлми нәме?

¹⁶ Гарыплары исләнинден махрум эден болсам, дул хатыны умытдан дүшүрен болсам,

¹⁷ я-да нанымы еке ийип, етимлер билен пайлашмадык болсам,

¹⁸ (яшлыгымдан бәри етимлере аталык эдип гелдим, догланым бәри дул хатынлара ёл гөркезип гелдим)

¹⁹ эшиксиз хеләк боланы, япынҗасы болмадык мәтәҗи гөрүп,

²⁰ олары гоюнларымың йүңи билен йылатмадык болсам, олар хем бүтин йүреги билен мени алкышламадык болсалар,

²¹ көмекчилеримиң тарапымы чалҗагына гөзүм етип, етиме эл галдыран болсам,

²² гой, омзум язсын, голум омзумдан омрулсын.

²³ Чүнки Худайдан гелҗек бетбагтчылыкдан горкдум, бейиклигинден яңа Онуң хузурында дуруп билмездим.

²⁴ Алтына бил баглан болсам, сап алтына ынам эден болсам,

²⁵ уммасыз байлыгыма буйсанып, элимиң газанҗына гуванан болсам,

²⁶ парлаян Гүне гарап, асмандакы аҗайып Ая бакып,

²⁷ көңлүмиң мейлини аздырып, Ая, гүне сежде хөкмүнде йүзүме сылан болсам,

²⁸ бу хем хөкүме лайык этмиш боларды, гөкдәки Худайы инкәр этдигим боларды.

²⁹ Душманларымың хеләкчилигине бегенип, башларындан бела иненде, хешелле какан дәлдирин.

³⁰ (Гаргыш билен оларың өлүмини диләп, дилим билен гүнә этмедим.)

³¹ Чадырымдакылар: „Эйюбың берен этинден гарныны доюрмаян бармы?“ диен болсалар,

³² (мысапыр көчеде ятан дәлдир, чүнки гапым мыдама ёлагчылар үчин ачыкды)

^33-34 мәхелледен җуда горкуп, оларың йигренҗинден хедер эдип, дымып, даша чыкман, йүрекде этмишлерими гизләп, бейлекилер ялы языкларымы яшыран дәлдирин.

³⁵ Вах, маңа бир гулак асян болсады! Вах, Гудратыгүйчли Худай, Сен бир маңа җогап берседиң! Шонда айдан затларымың хакдыгыны субут эдип, гол чекердим! Вах, Айыплайҗым хөкүмлери язып, элиме берседи!

³⁶ Шүбхесиз оны гершимде гөтерип, башыма тәч эдердим.

³⁷ Хер әтлән әдимимиң хасабатыны берердим Оңа, шазада кимин Онуң хузурына барардым.

³⁸ Ерим маңа гаршы перят эден болса, онуң кешлери биле аглашян болса,

³⁹ төлегсиз ериң хасылындан иен болсам, ер эелериниң җанына каст эден болсам,

⁴⁰ гой, ол ерде бугдай ерине тикен, арпа ерине хашал отлар битсин!» Эйюбың сөзлери тамам болды.