Eýýup 30 - Мукаддес Китап

30-нҗы бап Эйюп өз дерди барада айдяр

¹ «Эмма инди яшкичилер, үстүмден гүлйәрлер, аталарыны сүрими гораян итлериң янында гоймага-да лайык гөрмездим.

² Олардан маңа не пейда бар? Билеклеринде кувват ёк.

³ Олар мәтәчликден, ачлыкдан яңа гиҗе чөлде, харабалыкда ер гемирйәрлер.

⁴ Чөлдәки аҗы отлары йыгярлар, иймитлери сүбселигиң көкүдир.

⁵ Олар халк арасындан ковулярлар, халк огрулар ялы оларың үстүне гыгырышяр.

⁶ Җүлгедәки говакларда, ердәки чукурларда, гаяларың арасында месген тутярлар.

⁷ Чалылар арасында увлашып, тикенеклер астында бири-бирлерине дыкнышярлар.

⁸ Акмак, атсыз-сорсуз ынсан огуллары гамчыланып, юртдан чыкарылды.

⁹ Инди оларың огуллары мени нагма билен яңсылаярлар, мен олар үчин гүлки болуп галдым.

¹⁰ Мени йигренйәрлер, менден гача дурярлар, йүзүме түйкүрмеги-де хич затча гөрмейәрлер.

¹¹ Яйымың киршини кесип, Худайың маңа эҗир чекдирендиги үчин, олар гөзүмиң алнында исләнини эдйәрлер.

¹² Әҗит-мәҗитлер сагымдан хүҗүм эдип, аякларымы бүдредйәрлер, басып алмак үчин, ёллары тайярлаярлар.

¹³ Ёлумы бекләп, мени ёк этмәге чалышярлар, олары тогтадян ёк.

¹⁴ Дивар гәдиклеринден гечип, харабалыгың арасындан үстүме топулярлар.

¹⁵ Үстүме ховп абаняр, шан-шөхратым еле совруляр, хошвагтлыгым булут кимин гечип гитди.

¹⁶ Инди җаным такатдан дүшди, мени мушакгатлы гүнлер гуршап алды.

¹⁷ Гиҗесине сүңңүм сызлаяр, җанымы гемирйән агырылар дынувсыздыр.

¹⁸ Худай газап билен якамдан тутяр, эзенегимден япышяр.

¹⁹ Худай мени лая батырды, тоза, күле дөндүм мен.

²⁰ Саңа ялбарян, маңа җогап бермейәң, аяга галян, Сен гөзүңи диңе маңа дикйәң.

²¹ Маңа рехимсизлик этдиң, гүйч-гудратың билен мени эзйәң.

²² Мени галдырып, еле коваладяң, гай ичинде дерби-дагын эдйәң.

²³ Билйән мен, башымдан өлүм индерҗегиңи, әхли дирилер үчин тайынлан ериңе әкитҗекдигиңи.

²⁴ Медет диләп перят эдйәне, бетбагта гаршы эл галдырмак болмаз ахырын!

²⁵ Гара гүнлиниң халына агламадыммы? Ёксуллар үчин йүрегим гыйым-гыйым болмадымы?

²⁶ Эмма ягшылыга умыт багламда, яманлык гелди, ягтылыга гарашанымда, зулмат гелди.

²⁷ Ичим от алып, ынҗалык тапмаяр, мушакгатлы гүнлер башыма дүшйәр.

²⁸ Гүнешсиз хамым гараляр, җемагат арасында дуруп, перят эдйәрин.

²⁹ Шагаллара гардаш, дүегушлара ёлдаш болдум.

³⁰ Хамым гаралып союляр, сүеклерим гыздырмадан яняр.

³¹ Лирамың овазы яса, түйдүгимиң овазы агы сесине дөнйәр».