Eýýup 28 - Мукаддес Китап

28‑нҗи бап Пайхас өвгүси

¹ «Элбетде күмшүң кәни, алтының эредилйән гөвеҗи бардыр.

² Демир ерден алыняр, мис дашдан эредилйәр.

³ Ынсан гараңкылыгың соңуна чыкяр, зулматда мис агтарып, түм гараңкылыкда ериң аңры чәгине етйәр.

⁴ Ынсан аягы дегмедик ерлерде, йүплерден ашак салланып, илатсыз ерде магдан газяр.

⁵ Ерден чөрек өнйәр, асты болса от билен оюк-оюк эдилйәр.

⁶ Дашлары гөк якудың меканы, топрагында алтын бар.

⁷ Бу ёданы йыртыҗы гуш билйән дәлдир, оңа алгырың гөзи дүшмедик асла.

⁸ Буйсанҗаң хайванлар ол ере аяк басан дәлдирлер, арсланың-да аягы деген дәлдир оңа.

⁹ Магданчылар гаялары агтарып, дагларың дүйбүне ченли газярлар.

¹⁰ Гаяларың ичинден магдан газып алярлар, гөзлери гымматбаха затларың гөзлегиндедир.

¹¹ Чешмелериң акымыны тогтадып, гизлин хазыналары йүзе чыкарярлар.

¹² Эмма пайхас ниреден гелйәр? Дүшүнҗәниң гөзбашы ниреде?

¹³ Пайхасың гадырыны билмейәр ынсан, тапылгысыздыр ол бу дүнйәде.

¹⁴ Чуңлук: „Ол менде ёкдур“ диййәр, деңиз: „Ол менде дәл“ диййәр.

¹⁵ Не сап алтына, не-де күмше, чалшып боляр оны.

¹⁶ Опыр алтыны, гымматбаха хакык, гөк якут онуң бахасына етмез.

¹⁷ Не алтын, не-де гөвхер оңа тай гелер, оны сап алтын гаплара чалшып болмаз.

¹⁸ Мерҗен билен дүрүң-ә адам агзалмасын, пайхасың бахасы лагылданам гымматлыдыр.

¹⁹ Эфиопия топрагының гөк якуды оңа тай гелмез, хатда сап алтын билен хем баха кесип болмаз.

²⁰ Онда пайхас ниреден гелйәр? Дүшүнҗәниң гөзбашы ниреде?

²¹ Әхли җанлы-җандардан гизленйәндир ол, гөкдәки гушлардан хем яшырыляндыр.

²² Хеләкчилик ве Өлүм: „Диңе пайхасың мыш-мышыны эшитдик“ диййәрлер.

²³ Пайхаса ёлы Худай билйәр, онуң меканыны диңе Ол билйәр.

²⁴ Чүнки Худай ериң аңры чәгине сер саляр, гөклериң астындакы әхли зады гөрйәр.

²⁵ Елиң аграмыны кесгитләп, сувлары өлчеге гөрә пайланда,

²⁶ ягыш ягдырып, гөк гүбүрдисине ёл ачан вагты,

²⁷ Ол пайхасы гөрүп, ыглан этди, оны тассыклады, соңам сынады.

²⁸ Онсоң Ол адамзада: „Ине, Ребден горкмак – бу пайхасдыр. Шерден гача дурмак – бу дүшүнҗедир“ дийди».