Eýýup 27 - Мукаддес Китап

27‑нҗи бап Эйюп сөзүни довам эдйәр

¹ Эйюп сөзүни довам эдип, шейле дийди:

² «Хакымдан махрум эден Худайың, маңа аҗы хасрат чекдирен Гудратыгүйчлиниң адындан ант ичйән,

³ ичимде җаным, бурнумда Худайың деми барка,

⁴ хакы сөзләрин диңе, дилиме алман нәхак сөз.

⁵ Сизи акламарын асла, тә өлйәнчәм, пәклигимде галарын.

⁶ Догрулыгымы пугта сакларын, гойбермен, өмүрбойы паш этмез мени выжданым.

⁷ Гой, душманларым эрбетлериң гүнүне, гаршыдашларым пислериң гүнүне дүшсүн!

⁸ Худай худайсызы ёк эдип, җаныны алансоң, онда нәме умыт болсун?

⁹ Үстүне бетбагтчылык абананда, Худай онуң перядыны эшидерми?

¹⁰ Гудратыгүйчлүден хошал болармы ол? Ол хер заман медет диләрми Худайдан?

¹¹ Сизе Худайың гудратыны, яшырман аян эдерин Гудратыгүйчлиниң ёлларын.

¹² Муны өз гөзүңиз билен гөрдүңиз, нәме үчин бейле бош гүррүң эдйәңиз?

¹³ Шудур Худайың эрбетлере берҗек пайы, Гудратыгүйчлиниң залымлара берҗек мирасы:

¹⁴ Нәче көп болса-да, огуллары гылычдан гырылярлар, зүрятлары-да ачлыкдан.

¹⁵ Аман галанлары гыргындан өлүп гөмлерлер, дул хатынлары ясын тутмаз оларың.

¹⁶ Күмши чәге кимин йыгнап, гейим барын топласалар-да,

¹⁷ догручыллар геер олары, бигүнәлер пайлашарлар ол күмүшлери.

¹⁸ Хөвүртгелер ялы, сакчың чатмасы ялы дикйәрлер өйлерини.

¹⁹ Барлы байлык билен ука гиденем болса, гөзүни ачанда, тапмаз байлыгын.

²⁰ Олары горкы басяр сил кимин, гиҗесине түвелей учурып әкидйәр.

²¹ Сөртүк ели өз угруна гөтерип әкидйәр, олары өз месгенлеринден сүпүрип ташлаяр.

²² Газап билен үстлерине окдурыляр ел, бу газаплы елден гачмага сынанышярлар.

²³ Ел олара эл чарпып, еринден сыкылык атяр».