Eýýup 26 - Мукаддес Китап

26-нҗы бап Эйюп Билдада җогап берйәр

¹ Эйюп шейле дийди:

² «Сен кувватсыза нәхили ярдам этдиң! Гүйчсүзе нәхили медет бердиң!

³ Акмага нәхили пайхас бердиң, пайхассыза нәхили өвүт бердиң!

⁴ Бу сөзлери саңа өвреден ким? Сен аркалы геплейән кимиң рухы?

⁵ Чуң сувларың астындакы өлүлер өз меканларында титрешйәрлер.

⁶ Худайың өңүнде өлүлер дүнйәси ялаңачдыр, хеләкчилик ериниң өртүги ёкдур.

⁷ Худай гөклери бошлугың үстүне язяр, ери-де хич затдан асяр.

⁸ Сувлары булутларың ичинде саклаяр, булутлар оларың аграмына бөвсүлмейәр.

⁹ Тагтының йүзүни бүрейәр, үстүни булут билен өртйәр.

¹⁰ Ягтылык билен гараңкылыгың арасына, сувларың йүзүне серхет чекди.

¹¹ Гөгүң сүтүнлери сарсяр, Худайдан горкуларына титрешйәр.

¹² Гүйҗи билен деңзи тогтатды Ол, әпет Рахабы ёк этди пайхасы билен.

¹³ Гөклер Онуң деми билен гөзел болды, аждарханы эли билен ёк этди.

¹⁴ Уҗыпсызҗа бөлегидир булар Онуң ёлларының, Ол хакда эшидйәнлеримиз, гөр, нәхили аз! Дүшүнип билҗек бармы гудратының бейиклигине Онуң?»