Eýýup 24 - Мукаддес Китап

24‑нҗи бап Эйюп шикаятыны довам эдйәр

¹ «Нәме үчин Гудратыгүйчли хөкүме вагт беллемейәр? Нәме үчин Оны танаянлар бу гүнлери гөрмейәрлер?

² Адамлар арачәк дашлары сүйшүрйәрлер, сүрүлери огурлаярлар-да, бакярлар.

³ Етимлериң эшегини огурлап әкидйәрлер, дул хатының өкүзини гирев алярлар.

⁴ Мәтәчлери ёлдан ковярлар, юрдуң гарыплары олардан букулярлар.

⁵ Чөлдәки гуланлар кимин, ёксулларың херси бир яна дагап гидйәр, Олар чагалары үчин чөлде иймит гөзлейәрлер.

⁶ Иймитлерини кесекилериң экин мейданындан йыгнамалы болярлар, эрбетлериң үзүм багындан галан-гачаныны йыгярлар.

⁷ Гиҗе эшиксиз, ялаңач ятярлар, совукда япынмага ёрганлары ёк.

⁸ Даглара яган чабгадан эзилйәрлер, гаяны пена эдинип гуҗаклаярлар.

⁹ Сүйтден айрылмадык етим чага огурланяр, гарыбың чагасы гирев алыняр.

¹⁰ Олар дашарда ялаңач энтейәрлер, ач гарна бугдай десселерини дашаярлар.

¹¹ Дашларың арасында яг үчин зейтуны енчйәрлер, шерап үчин үзүм сыкярлар, эмма өзлери тешнедир.

¹² Шәхерлерден өлүп барянларың иңңилдиси эшидилйәр, җаны хасратлылар перят эдйәрлер, эмма шонда-да Худай оларың дилеглерине үнс бермейәр.

¹³ Ине, ягтылыга гаршы баш гөтерйәнлер бар, ягтылыгың ёлуны танамаз олар, онуң ёдаларындан йөремезлер.

¹⁴ Гарыбы, ёксулы өлдүрмек үчин, ганхор алагараңкылыкда ояняр, гиҗесине болса огурлык эдйәр.

¹⁵ Зына эдйәнлериң гөзи алагараңкылыкдадыр, хич ким гөрмез өйдйәрлер, йүзлерини бүрейәрлер.

¹⁶ Гиҗесине өй талаярлар, гүндизине гизленйәрлер, Ышыгың нәмедигини билмейәрлер.

¹⁷ Чүнки сәхер олара түм гараңкылыкдыр, түм гараңкылыгың ховпларына өвренишен олар.

¹⁸ Пислер сувуң йүзүндәки көпүк киминдир, оларың ер пайы нәлетленендир, хич ким оларың үзүм багына аяк басмаз.

¹⁹ Гураклыгың ве ыссының гар сувларыны соруп алшы дей, өлүлер дүнйәси-де гүнәкәрлери ювудяндыр.

²⁰ Олары эне ятгысы унудяр, гурт олары ийип, леззет аляр, олар хич кимиң ядына дүшмейәрлер, адалатсызлык агач кимин сындырыляр.

²¹ Пислер өнелгесиз аяла сүтем эдйәрлер, дул хатына ягшылык этмейәрлер.

²² Худай гудраты билен гүйчлүлери ере чаляр, олар бейгелселер-де, яшамага умытлары галмаз.

²³ Худай олара ховпсузлык берйәр, олар Оңа даянярлар, Онуң гөзи оларың ёлларындадыр.

²⁴ Бир салым гөтерилип, соңра йитирим болярлар, башгалар ялы гурап, ёк болярлар, дәне башлары кимин кесилйәрлер.

²⁵ Мен нәхак болсам, яланчылыгымы ким субут этҗек? Ким сөзлеримиң дерексиздигини гөркезҗек?»