Eýýup 22 - Мукаддес Китап

22‑нҗи бап Элипаз Эйюба җогап берйәр

¹ Тейманлы Элипаз шейле дийди:

² «Ынсан Худая ярамлы болуп билерми? Хатда иң акылдарың Оңа пейдасы дегерми?

³ Догрулыгыңдан Гудратыгүйчли нәме леззет аляр? Пәк дурмушда яшаяның Худая нәме хайры бар?

⁴ Худайың сени җезаландырмасы, хөкүм этмеси Ондан горкяндыгың үчинми?

⁵ Эрбетлигиң уммасыз, этмишлериң түкениксиз дәлми?

⁶ Чүнки өз доганыңдан нәхак гирев алдың, эшиклерине ченли сыпырып, олары ялаңач гойдуң.

⁷ Ядава ичмәге сув бермедиң, ачдан чөрегиңи гысгандың.

⁸ Ине, гүйчлүлер үлкә эе боляндыр, хорматланян онда яшаяндыр.

⁹ Дул хатынлары ызына бош гойбердиң, етимлери эздиң.

¹⁰ Мунуң үчин даш-төверегиң дузаклар билен гуршаляр, дуйдансыз горкы сени галагоплуга саляр.

¹¹ Хич зады гөрүп билмезиң ялы, гараңкылык сени басяр, сил гелип, сени гарк эдйәр.

¹² Худай гөклериң ёкарсында дәлмидир? Ёкардакы йылдызлара назар сал, олар, гөр, нәхили белентликде!

¹³ Шонуң үчин сен: „Худай нәмәни билйәр? Ол түм гараңкылык ичинден хөкүм эдип билйәрми?

¹⁴ Булутлар Оңа тутудыр, Ол гөрүп билмез, Ол гөк гүммезинде гезйәндир“ диййәң.

¹⁵ Пислериң йөрән көне ёлуны тутҗакмы?

¹⁶ Олар вагтындан өң йыгналдылар, дүйплерини сув алды.

¹⁷ Олар Худая: „Бизи өз гүнүмизе гой! Гудратыгүйчли, сен бизе нәме эдип билерсиң?“ дийдилер.

¹⁸ Шонда-да Худай өйлерини берекет билен долдурды, пислериң маслахаты менден узакда болсун!

¹⁹ Догручыллар пислериң вейран эдиленини гөрүп бегенйәр, бигүнә хем оларың үстүнден гүлйәр.

²⁰ Олар: „Ягыларымыз ёк эдилди, галан затлары янып күл болды“ диййәрлер.

²¹ Худай билен дост бол, рахатлыкда бол, шонда хайыр тапарсың.

²² Гулак гой Онуң агзындан чыкян өвүт-үндеве, сөзлерини йүрегиңде сакла.

²³ Гудратыгүйчлә тарап өврүлсең, өңки халыңа говшарсың, этмиши чадырыңдан узаклашдырсаң,

²⁴ алтыны топрага, Опыр тылласыны җүлгедәки дашларың арасына атсаң,

²⁵ Гудратыгүйчлини өз алтының, гымматбаха күмшүң сайсаң,

²⁶ ине, шонда Гудратыгүйчлүден гөвнүхош боларсың, Худая йүз тутарсың.

²⁷ Худайдан дилег эдерсиң, Ол хем сени эшидер, сен худайёлуларыңы берерсиң.

²⁸ Ол диен задыңы ерине етирер, ёлларыңа нур чайылар.

²⁹ Бейлекилер кемсидиленде: „Ериңден гал“ диййәң, чүнки Худай пес гөвүнлилери халас эдйәр.

³⁰ Худай хатда языклылары-да халас эдер, олар сениң эллериң тәмизлиги үчин гутуларлар».